Eldi damytýdyń 2025 jylǵa deıingi ulttyq jospary jasalady

NUR-SULTAN. QazAqparat – Qazaqstanda eldi damytýdyń 2025 jylǵa deıingi ulttyq jospary daıyndalady. Bul jóninde Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysynda aıtyldy, dep habarlaıdy QazAqparat tilshisi.

Jańartylǵan memlekettik josparlaý júıesi baǵdarlamalyq qujattardyń neǵurlym ıkemdi arhıtektýrasyn quryp, strategııalyq jáne bıýdjettik josparlaýdyń ózara baılanysyn arttyryp, memlekettik organdar men uıymdar basshylarynyń tikeleı jaýapkershiligin naqty bekitýge tıis.

Aqordada ótken jıynda álemdegi jetekshi memleketterdiń birine aınalý úshin eldi odan ary damytýdyń úsh negizgi baǵytyn anyqtaý usynyldy. Olar: ınstıtýttardyń sapasy, azamattardyń ál-aýqaty jáne qýatty ekonomıka.

Bul rette orta merzimdi kezeńge arnalǵan mindetterdi aıqyndaıtyn negizgi qujat – eldi damytýdyń 2025 jylǵa deıingi ulttyq jospary bolady. Onda mańyzdy salalardy damytýdaǵy kózqaras, negizgi saıasatty jetildirý jónindegi baǵyttar kórsetiledi.

Ulttyq jobalar qyzmettegi jáne saladaǵy belgili bir baǵyttardyń negizgi máselelerin sheshýge baǵyttalady. Olar barynsha salalyq bolýǵa tıis. Belgili bir merzimde naqty nátıje alýǵa baǵyttalyp, tolyǵymen qarjylandyrylýy kerek.

Qazirgi ýaqytta tsıfrlandyrý, agroónerkásiptik keshendi damytý, kásipkerlik, básekelestik, qorshaǵan ortany qorǵaý jáne basqa da baǵyttaǵy jobalardy ázirleý jumystary júrgizilýde. Bul qujattar osy jyldyń 1 shildesinen keshiktirilmeı ázirlenip, bekitilýi kerek.

Qasym-Jomart Toqaev salalyq máselelerdi talqylaýǵa bilikti sarapshylardyń belsendi qatysýyn qamtamasyz etýdi tapsyrdy. Al eger asa mańyzdy qoǵamdyq múddeler qozǵalar bolsa, onda azamattardy bul máselege barynsha tartýdy júktedi.