Elden erek: Almaty budan bylaı kólik sýbsıdııasynyń talaptaryn ózi bekitedi

ALMATY. KAZINFORM — Almatyda qalalyq máslıhattyń kezekti XIX sessııasy ótip jatyr. Sessııa barysyndaǵy suraq-jaýap kezinde Almaty qalasy ákiminiń orynbasary Asqar Ámrın jergilikti tasymaldaýshy kompanııalardy sýbsıdııalaý máselesine pikir bildirdi.

Onyń aıtýynsha, qaladaǵy tasymaldaýshylardy sýbsıdııalaý erejeleri men ádisnamasy mınıstrlik tarapynan bekitilgen.

Biraq jaýapty vedomstovonyń erejesi qala talaptaryna sáıkes kele bermeıdi.

— Osy jyly jalpy sýbsıdııa somasy — 96 mlrd teńge. 23 avtobýs parki úshin bul óte úlken qarjy. Ol 2022 jyly-aq belgili bolǵan. Sol kezden beri ne istedik? Sýbsıdııa respýblıkalyq emes, jergilikti bıýdjetten beriletindikten jańadan qurylǵan Kólik mınıstrligimen baılanysta boldyq. Májiliske bir aı buryn osy máselemen bardym. Zań jobasy Senatqa jiberildi. Endi jergilikti qoǵamdyq kólikti sýbsıdııalaý erejesin Almaty qalasynyń máslıhaty bekitetin bolady. Mundaı tájirıbe esh jerde joq. Tek Almaty qalasynda biz ózimiz sýbsıdııa erejelerin bekitetin bolamyz, — dedi Almaty ákiminiń orynbasary Asqar Ámrın.

Sondaı-aq Asqar Ámrın atalmysh zań jobasy qabyldansa, keler jyldyń qarajatyn qala talaptaryna saı bekitýdi josparlap otyrǵanyn atap ótti.

— Biz Almaty aglomeratsııasynyń tereńdigin keńeıtip jatyrmyz. Ótken jyly aglomeratsııaǵa deıin 50 shaqyrym jerge 10 jańa baǵyt ashtyq. Bıyl taǵy 20 baǵyt ashsaq deımiz. Eger osy baǵyttardy engizip, sýbsıdııaǵa aqsha bóletin bolsaq, kúnde qalaǵa kiretin 450 myńǵa jýyq kóliktiń sany azaıady. Onyń barlyǵy jergilikti bıýdjet esebinen júrgiziledi. Osy aıda Senat otyrysy ótip, odan keıin zań jobasy Prezıdenttiń qol qoıýyna jiberilýi kerek. Zań kúshine engen soń, biz kelesi jyldyń bıýdjetin qalanyń talaptaryna saı bekitkimiz keledi, — dedi ol.