Eldegi sý qoımalarynyń jaǵdaıy týraly derekter jarııalandy
ASTANA. KAZINFORM – Prezıdent tapsyrmasymen Sý resýrstary jáne ırrıgatsııa mınıstrligi Sý resýrstaryn basqarý júıesin damytý tujyrymdamasyn qaıta qaraıdy. Qujatqa sý tasqynynyń aldyn alý jáne onyń shyǵyndaryn azaıtý jónindegi keshendi is-sharalar qosylady.
«Qazirgi ýaqytta Aqmola oblysynda eki iri sý qoımasy 100% toly. Munda sý tasqynynyń belsendi kezeńi ótip, salalary turaqtandy. Biraq, Jabaı ózeniniń rettelmeıtin aǵynynyń artýyna baılanysty Atbasarda sý tasqyny jalǵasyp jatyr. Soltústik Qazaqstan oblysynda 2 iri sý qoımasy 100% toly, sý tasqyny jalǵasyp jatyr. Eki sý qoımasy da shtattyq kestege saı jumys istep tur, buzylý qaýpi joq. Sý toraptary kópfaktorly tekserýden ótti, tehnıkalyq jaǵdaıy qanaǵattanarlyq», - dedi QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva Ortalyq kommýnıkatsııalar qyzmetinde.
Sonymen birge, Petropavl qalasy shegindegi Esil ózeniniń deńgeıi – 1 243 sm, bir táýlikte ol 103 sm-ge kóterildi. Mamandar sý ótkizý is-sharalaryn atqaryp jatyr.
Aqtóbe oblysynda eki iri sý qoımasynyń ortasha sý jınaý kórsetkishi – 97%. Óńirdegi jaǵdaı turaqty.
Batys Qazaqstan oblysynda tórt iri sý qoımasynyń ortasha sý jınaýy – 74%. Irekli sý qoımasynan jiberilgen sý áli Qazaqstan shekarasyna jetken joq. Buǵan qatysty boljam ózgermedi. Bul sý 16-17 sáýirde keledi dep kútilýde.
Qostanaı oblysynda eki iri sý qoımasynyń ortasha sý jınaý kórsetkishi 93%, sý tasqynynyń belsendi kezeńi ótti. Qaratomar sý qoımasy tranzıttik rejımde jumysyn jalǵastyryp jatyr.
Shyǵys Qazaqstan oblysynda eki iri sý qoımasy boıynsha ortasha sý jınaý kórsetkishi – 80%.
Abaı oblysynda Shúlbi sý qoımasy 89%-ǵa toldy. Óńirde sý tasqyny jalǵasýda. Shúlbi sý qoımasyna aǵyndardyń ulǵaıýyna baılanysty sý jiberý jumysy júrgizilip jatyr. Jalpy, Ertis kaskadynyń sý qoımalary shtattyq kestege saı jumys istep tur.
Qaraǵandy oblysynda 3 iri sý qoımasy 99%-ǵa toly, óńirde sý tasqynynyń qaýipti kezeńi ótti. Jaǵdaı turaqty.
