Eldegi áleýmettik kásipkerlik sýbektileriniń sany 1577-ge artty
ASTANA. KAZINFORM — 2025 jylǵy qorytyndy boıynsha elde 1 431 áleýmettik kásiporyn jumys istegen.
Ulttyq ekonomıka mınıstrligi, 2026 jylǵy birinshi toqsannyń qorytyndysy boıynsha, elimizdegi áleýmettik kásipkerlik sýbektileriniń (ÁKS) sany 1 577-ge jetkenin habarlaıdy. Eseptik kezeńde Tizilimge 146 jańa qatysýshynyń engizilýi bul sektordaǵy turaqty ósýdi aıǵaqtaıdy.
Salystyrsaq, 2025 jylǵy qorytyndy boıynsha elde 1 431 áleýmettik kásiporyn jumys istegen. Tizilimge engizilgen áleýmettik kásipkerlik sýbektileri qarjylyq, ınfraqurylymdyq jáne konsýltatsııalyq kómekti qosqanda, memlekettik qoldaý sharalaryn alýǵa quqyly. Qoldaýdyń negizgi quraldarynyń qatarynda paıyzdyq mólsherlemeni sýbsıdııalaý, kredıtke kepildik berý jáne memlekettik grant berý bar (QR Úkimetiniń 2024 jylǵy 17 qyrkúıektegi № 754 qaýlysy).
Áleýmettik kásipkerlik zańnamada alǵash ret 2021 jyly bekitildi. Ol azamattar men qoǵamnyń áleýmettik máselesin sheshýge arnalǵan kásipkerlik qyzmet retinde anyqtalady. Oǵan múmkindigi shekteýli adamdar qurǵan kásiporyndar, sondaı-aq erekshe qajettiligi bar adamdar men halyqtyń áleýmettik osal tobynyń ókilderi úshin jumys ornyn qamtamasyz etetin uıymdar kiredi.
Tizilimdi qalyptastyrý men júrgizý ortalyq jáne jergilikti memlekettik organdardyń ózara is-qımyly negizinde júzege asyrylady. Oblystardyń jáne respýblıkalyq mańyzy bar qalalardyń jergilikti atqarýshy organdary arnaıy komıssııalar jumysynyń nátıjesi boıynsha málimet beredi. Olar ótinimderdi qarap, jeke kásipkerler men zańdy tulǵalardy (iri bıznes sýbektilerin qospaǵanda) resmı tizimge engizý jóninde usynymdar ázirleıdi.
Aıta ketelik elde kásipkerlik sýbsıdııa kimge berilmeıtini týraly jazǵan edik.