Eldegi 85 mektepke Astanadaǵy Kanada mektebiniń ozyq tájirıbesi engizilýi múmkin
ASTANA. KAZINFORM – Astanada «Kosem 2025» kóshbasshylar forýmy ótip jatyr.
The Ulytau Educational Foundation qoǵamdyq qaıyrymdylyq qory men Astanadaǵy halyqaralyq Kanada mektebi uıymdastyrǵan eki kúndik is-sharanyń paneldik otyrysy Ulttyq mýzeıde ótti.
Forýmǵa bıznes kóshbasshylar, memlekettik organdar men kommertsııalyq emes mekemelerdiń, qaıyrymdylyq uıymdarynyń ókilderi, stýdentter men oqýshylar, Astanadaǵy jáne óńirlerdegi mektep jetekshileri shaqyrylypty.
The Ulytau Educational Foundation qaıyrymdylyq qorynyń Jezqazǵan qalasyndaǵy aımaqtyq ókildiginiń basshysy Gúlmıra Jappasova forým úsh óńirdegi 85 mekteptiń basyn qosqanyn aıtady.
- Bul qor bizdiń óńirge 2021 jyly keldi. «Qazaqmys» korporatsııasy osy qorǵa óńirdegi mektepterdiń bilim sapasyn arttyrýǵa arnalǵan baǵdarlama ázirlep, iske asyrý týraly tapsyrys bergen bolatyn. Jezqazǵannyń Astana, Almaty sııaqty iri qalalardan alshaq jatýy muǵalimderdiń de, oqýshylardyń da óz-ózin damytýyna, ózge óńirdegi áriptesterimen, zamandastarymen tanysyp, zeıin kókjıegin keńeıtýine biraz kedergi keltiredi. Qor osymen tórtinshi jyl qatarynan Ulytaý oblysynyń 50-den astam mektebimen tyǵyz jumys istep keledi. Onyń syrtynda Qaraǵandy oblysynyń Balqash qalasyndaǵy búkil mektepter men aýyl mektepteri, Jambyl oblysy Shý aýdanyndaǵy 6 mektep pen 2 kolledjde de osy baǵdarlama iske asyrylyp keledi, - deıdi ol.
Atalǵan baǵdarlama aıasynda pedagogterdiń biliktiligin arttyrýǵa arnalǵan kýrstar, oqýshylarǵa arnalǵan aǵylshyn tiliniń qosymsha sabaqtary, aǵylshyn tili muǵalimderin ádistemelik súıemeldeý sharalary uıymdastyrylady. Ǵylymı jobalar men baǵyttar aıasynda ıntellektýaldyq oıyndar ótkiziledi. Ol jobalarǵa jetekshilik etken balalardyń aldy shetelge shyqqan.
- Taǵy bir baǵyt – kásibı baǵdar berý. Onyń aıasynda oqýshylarǵa mamandyq tańdaý máselesinde aqyl-keńes berilip, qoldaý kórsetiledi. Búgingi «Kosem 2025» kóshbasshylar forýmyn da bizdiń qordyń eń iri is-sharalarynyń biri dep aıta alamyn.
Bıznestegi lıderlermen, óz salasynda kóshbasshyǵa aınalǵan muǵalimdermen kezdesý arqyly balalardyń ózine degen senimin arttyrýdy kózdep otyrmyz, - deıdi Gúlmıra Jappasova.
Aıtýynsha, forýmǵa óńirlerden shaqyrylǵan oqýshylar bir apta boıy Astanadaǵy Kanada mektebinde dáris tyńdap, ondaǵy zamandastarymen tanysqan kórinedi.
- Erteń Kanada mektebi men qor baǵdarlamasyna qatysýshy mektepter arasynda ózara yntymaqtastyq týraly memorandýmdar bekitiledi. Osy arqyly Astana mektebiniń ozyq tájirıbesin birneshe óńirge, aýyl mektepterine taratý múmkindigi týyndap otyr.
Kanada mektebimen aradaǵy baılanystyń arqasynda bizdiń mektepterde transformatsııa júrip jatqanyn naqty kórip otyrmyz. Ol mektepterde aǵylshyn tili páni Kanada mektebiniń tájirıbesi boıynsha oqytylady. Sonyń arqasynda IELTS testileýden 7,5 balǵa deıin baǵa alǵan oqýshylarymyz bar, - deıdi qaıyrymdylyq qorynyń ókili.
Forýmǵa shaqyrylǵan qonaqtardyń arasynda Májilis depýtaty Murat Ábenov te boldy.
- Bul forýmnyń taqyryby maǵan erekshe jaqyn. Óıtkeni negizgi mamandyǵym – ınformatıka pániniń muǵalimi. Eńbek jolym osy baǵyttan bastalǵan. Keıin sol kezdegi Bilim jáne ǵylym mınıstriniń orynbasary bolyp júrgen ýaqytta da jastardyń kóshbasshylyq qabiletin damytý máselesimen tikeleı aınalysqanym bar. Oqýshyǵa mektep qabyrǵasynda beriletin bilim naqty ómirdiń mysaldarymen birge sińirilýi kerek. Ozyq memleketterdiń bári osy baǵytta alǵa qaryshtap ketti. Sondaı ozyq tásildiń biri – kóshbasshylyq qasıetti bala boıynan jetkinshek shaǵynda-aq oıatyp, jetildirý, - dedi depýtat.
Ulytaý, Qaraǵandy jáne Jambyl oblystaryndaǵy zamandastaryn shet tilin meńgerýdiń álemdegi ozyq tásilderine baýlyp júrgen Arýjan Málikti áńgimege tarttyq. Astanadaǵy Halyqaralyq Kanada mektebiniń 9 synyp oqýshysy shalǵaıdaǵy zamandastary men ini-qaryndastaryna óz bilgenin úıretý arqyly óz bilimin de sanaǵa bekite túskenin aıtady.
- Men shalǵaı mektepterdiń oqýshylaryna onlaın baılanys arqyly kóshbasshylyq baǵytyndaǵy tájirıbemdi ǵana úıretip qoımaı, aǵylshyn tilinen qosymsha úıirme júrgizemin. Sonyń arqasynda men jetekshilik jasaǵan keıbir oqýshylar shetelge oqýǵa túsip ketti. Men de osynyń arqasynda qalaǵan oqýyma joldama alyp otyrmyn, - deıdi Arýjan.
The Ulytau Educational Foundation» qoǵamdyq qaıyrymdylyq qorynyń dırektory Marına Han «Qazaqmys» qarjylandyryp otyrǵan bul joba birneshe óńirdegi mono qalanyń adamı kapıtalyn damytyp jatqanyn aıtady.
- Bizdegi mono qalalardyń halqy jappaı kóship jatyr. Al Qazaqstan ekonomıkasynda mono qalalardyń alatyn orny erekshe. Osy qalalardy bilim sapasyn kóterý arqyly ǵana ornyqty damyta alamyz. «Qazaqmystyń» bastamasy boıynsha 5 jyldyq baǵdarlama ázirlegenbiz. Osy ekijaqty baılanystyń jemisin kórgen ózge de taý-ken kásiporyndardyń ókilderi búgingi forýmǵa qatysyp otyr. Keleshekte olar da óz óńirlerinde osyndaı ıgi isterge qoldaý kórsetedi degen úmitimiz bar, - deıdi Marına Han.
Joba avtorlary bul forýmdy dástúrli is-sharaǵa aınaldyrmaqshy.
Aıta keteıik, kelesi oqý jylynan bastap bastaýysh jáne orta synyp oqýshylary jańa bilim standartyna kóshedi.