Qosymsha qun salyǵy shegin nelikten kóterý qajet — Serik Jumanǵarın túsindirdi

ASTANA. KAZINFORM — Qazaqstanda qosylǵan qun salyǵy shegin 15 mln teńgege deıin tómendetý usynyldy. Bul shara shaǵyn jáne orta bızneske aıtarlyqtaı áser etpeıtini aıtyldy.

QR Premer-Mınıstriniń birinshi orynbasary Serik Jumanǵarın Úkimettiń keńeıtilgen otyrysynda nelikten QQS shegin kóterý qajettigin túsindirdi.

Qazirgi ýaqytta Parlamentte jańa Salyq kodeksiniń jobasy talqylanyp jatyr. Oǵan salyqtyq jeńildikterdi qysqartý, ekinshi deńgeıli bankterge, oıyn bıznesine, sán-saltanat buıymdaryna salyqty arttyrý sııaqty birqatar shara qarastyrylǵan.

Alaıda S. Jumanǵarın bul sharalardy sapaly ekonomıkalyq ósim máselelerin tolyq sheshýge jetkiliksiz dep otyr.

— Bizde damý bıýdjeti jetkiliksiz deńgeıde, bul salyqtardyń az jınalýymen baılanysty. Shoǵyrlandyrylǵan bıýdjettiń salyq túsimderiniń JІÓ-ge qatysty úlesi 20%-dy quraıdy, al respýblıkalyq bıýdjettiń salyq túsimderiniń JІÓ-ge qatynasy tipti az — 10,8%. Bul kórsetkish damyǵan elderde 40%-dan asady, — dep atap ótti Úkimet basshysynyń orynbasary.

Negizgi salyqtardyń biri — qosylǵan qun salyǵy (QQS). Jalpy jınalǵan salyqtar qurylymynda QQS-tyń úlesi 24%-dan asady.

— Alaıda, QQS-tyń máni burmalanyp otyr, bul burynǵy jyldary júrgizilgen salyq reformalarynyń saldary. 1995 jyldan 2009 jylǵa deıin QQS mólsherlemesi 20%-dan 12%-ǵa deıin, al KTS (korporatıvtik tabys salyǵy) 30%-dan 20%-ǵa deıin tómendetildi. Bul sharalar salyq jáne ınvestıtsııa klımatyn jaqsartý, elde kásiporyndar men ınvestıtsııalardy kóbeıtýdi maqsat etti. Bir ýaqytta kóptegen salyqtyq jeńildikter berilip, jalpy salyq júıesi lıberaldandy, al salyqtardyń jınalýy azaıdy. Salyqty ońtaılandyrýǵa múmkindik beretin zańdy joldar paıda boldy, bıznes usaqtalyp ketti. Al QQS is júzinde 12%-dyq bólshek salyqqa aınaldy, — dep túsindirdi spıker.

Búginde elimizde tirkelgen 2 mıllıon 300 myńnan astam salyq tóleýshiniń 137,7 myńy ǵana QQS tóleıdi, bul jalpy sanynyń 6%-y ǵana. Olardyń ishinde naqty QQS tóleıtinder 88 myń nemese barlyq salyq tóleýshilerdiń 4%-y ǵana.

— Negizgi sebepterdiń biri — QQS boıynsha tirkeý sheginiń joǵary bolýy (78 mıllıon teńge). Sondyqtan, birinshi kezekte, biz QQS shegin 15 mıllıon teńgege deıin tómendetýdi usynamyz. Qazirgi tańda osy shekterde ShOB-tyń 80%-y jumys isteıdi, sondyqtan bul shara olardyń kópshiligine aıtarlyqtaı áser etpeıdi. EYDU elderinde QQS tirkeý shegi budan da tómen, al keıbir jetekshi ekonomıkalarda ol tipti nólge teń. Osylaısha, QQS qaıtadan esepteýge arnalǵan salyqqa aınalady, — dedi Serik Jumanǵarın.

Aıta keteıik, Astanada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onda elimizdiń 2024 jylǵy áleýmettik-ekonomıkalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri belgilenedi.

Buǵan deıin Kazinform agenttigi Úkimettiń byltyrǵy keńeıtilgen otyrysynda berilgen tapsyrmalar qanshalyqty oryndalǵanyn taldap kórgen edi.