Elde jas ǵalymdar baspanamen qalaı qamtamasyz etilip jatyr

ASTANA. KAZINFORM — Memleket tarapynan JOO oqytýshylaryn baspanamen qamtamasy etý tetikteri qarastyrylǵan ba? Byltyr olarǵa arnaıy baspana berildi me? Bul suraqqa Ǵylym jáne joǵary bilim mınıstrligi jaýap berdi. 

— Memleket basshysynyń 2024 jylǵy 31 mamyrda bergen tapsyrmasyna sáıkes, Ǵylym jáne joǵary bilim mınıstrligi ǵylymı uıymdar men joǵary jáne joǵary oqý ornynan keıingi bilim berý uıymdarynyń jas ǵalymdaryna arnalǵan páter berý jumystaryn iske asyryp keledi. 2023 jylǵy 19 qazanda mınıstrlik jáne Otbasy bank arasynda jas ǵalymdarǵa kredıt berýdiń 2023-2027 jyldarǵa arnalǵan baǵdarlamasy boıynsha yntymaqtastyq týraly kelisimge qol qoıyldy (Bank qarajaty esebinen), — delingen mınıstrliktiń Kazinform agenttigine bergen jaýabynda.

Jalpy, 2023-2026 jyldar aralyǵynda júrgizilgen jumystardyń qorytyndysy boıynsha 601 jas ǵalymǵa páter kilti tabystaldy.

— Onyń ishinde 483 páter mınıstrlik pen Otbasy bank 2023-2026 jyldary jas ǵalymdarǵa arnalǵan jeńildetilgen nesıe baǵdarlamasy boıynsha, sondaı-aq Memleket basshysynyń tapsyrmasy aıasynda 2024-2026 jyldary Almaty jáne Astana qalalarynda 118 páter óteýsiz negizde berildi.

Aıta keteıik, jyl basynda QR Ǵylym jáne joǵary bilim mınıstri Saıasat Nurbek 10 jas zertteýshige jańa páterlerdiń sertıfıkatyn saltanatty túrde tabys etti.