Elde zeınetaqynyń ortasha mólsheri qansha
ASTANA. KAZINFORM — Jyl basynan beri qazaqstandyqtarǵa 346 mlrd teńgege zeınetaqy tólendi.

Jyl basynan beri respýblıkalyq bıýdjetten 346 mlrd teńge somasyna zeınetaqy tólendi, onyń ishinde bazalyq zeınetaqy tóleýge – 111,8 mlrd teńge, yntymaqty zeınetaqy tóleýge – 234,2 mlrd teńge qarastyryldy.
2025 jylǵy 1 aqpandaǵy jaǵdaı boıynsha zeınetkerler sany – 2 mln 445 myń adam.
- 2025 jylǵy 1 aqpandaǵy jaǵdaı boıynsha jıyntyq zeınetaqynyń ortasha mólsheri 143 248 teńge, onyń ishinde yntymaqty zeınetaqy mólsheri – 95 789 teńge, bazalyq zeınetaqy – 47 459 teńge, - delingen Eńbek jáne halyqty áleýmettik qorǵaý mınıstrligi taratqan habarlamada.
Budan buryn habarlanǵandaı, 2025 jylǵy 1 qańtarda bazalyq zeınetaqy tóleminiń mólsheri Ulttyq bank aıqyndaıtyn ınflıatsııanyń boljamdy deńgeıine sáıkes 6,5%-ǵa, yntymaqty zeınetaqy 8,5%-ǵa, ıaǵnı ınflıatsııa deńgeıinen 2%-ǵa oza otyryp ulǵaıtyldy.
Budan basqa Memleket basshysynyń tapsyrmasy boıynsha 2023 jyldan bastap bes jyl ishinde eń tómen bazalyq zeınetaqyny eń tómen kúnkóris deńgeıiniń 70%-na deıin, eń joǵary – 120%-ǵa deıin jyl saıyn kezeń-kezeńimen arttyrý júzege asyrylady.
Máselen, 2025 jylǵy 1 qańtardan bastap bazalyq zeınetaqynyń eń tómen mólsheri eń tómen kúnkóris deńgeıiniń 65%-nan 70%-ǵa deıin ulǵaıtyldy, bul 32 360 teńge bolyp, onyń eń joǵary mólsheri eń tómen kúnkóris deńgeıinen 105-ten 110%-ǵa deıin arttyrylyp, 50 851 teńge boldy.
- 2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalatynyn eske salamyz. Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady, - delingen habarlamada.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq múlde joq bolsa, bazalyq zeınetaqy eń tómengi kúnkóris deńgeıiniń 70%-na teń bolsa, sodan keıin 10 jyldan asqan ár jyl úshin onyń mólsheri 2 %-ǵa artady. Al eger sizdiń ótilińiz 20 jyl bolsa, bazalyq zeınetaqy tómengi kúnkóris deńgeıiniń 90 %-yn quraıdy. Eńbek ótili 30 jyl nemese odan kóp bolsa, kúnkóris deńgeıiniń eń joǵarǵy mólsherinde ıaǵnı 110% belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy.
Osylaısha mindetti zeınetaqy jarnalary neǵurlym turaqty jáne tolyq kólemde aýdarylatyn bolsa, zeınet jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńdegi ortasha aılyq tabysyna baılanysty bolady.
Prokýratýra mindetti zeınetaqy jarnalaryn aýdarmaıtyndarǵa eskertý jasaǵan edi.