Elde týrıstik baǵyttarǵa jol salynyp jatyr
ASTANA. KAZINFORM – 2026 jyly Qazaqstanda eldiń negizgi týrıstik aımaqtaryna kólik qoljetimdiligin arttyrý baǵytyndaǵy aýqymdy jumystar jalǵasyp jatyr.
Respýblıkalyq mańyzy bar avtojoldardy rekonstrýktsııalaý jol júrý ýaqytyn qysqartyp qana qoımaı, jol boıyndaǵy ınfraqurylymnyń sapasyn da jaqsartady: bul ishki týrızmdi damytýdyń mańyzdy serpini bolmaq.
Týrızmdi damytý baǵytyndaǵy mańyzdy jobalardyń ishinde «Beıneý – Sekseýil» baǵyty erekshe mańyzǵa ıe, ol bolashaqta Kaspıı teńizine aparatyn joldy ashady. «Ortalyq – Batys» dálizi Torǵaı óńirindegi týrıstik aımaqtardy elordamen baılanystyryp, saıahatshylar úshinjańa baǵyttardy qalyptastyrady. Al «Óskemen – Rahman qaınary» jobasy Shyǵys Qazaqstannyń týrızm salasyn damytýǵa serpin beredi.
Budan bólek, respýblıkalyq mańyzy bar joldardy ortasha jóndeýdiń aýqymdy jobasy aıasynda Qazaqstannyń týrıstik aımaqtaryna aparatyn birqatar jol ýchaskeleri jańartylady. Atap aıtqanda, Jańaózen – Kendirli, Óskemen – Qatonqaraǵaı, Kókshetaý – Zerendi, Kegen – Qyrǵyzstan shekarasy, Qalqaman – Baıanaýyl avtojoldary qamtylady.
Sonymen qatar, jergilikti atqarýshy organdar týrıstik aımaqtarǵa qolaıly qatynaýdy qamtamasyz etýge baǵyttalǵan 33 óńirlik jobany iske asyrýda. Buǵan qosa, «QazAvtoJol» UK» AQ oblys ákimdikterimen birlesip, jol boıyndaǵy servısti damytý jumystaryn júrgizýde. 2026 jyly jol boıy servıstiń 50 jańa nysanyn salý josparlanýda. Kásipkerlerdi qoldaý úshin nysandardy kútip ustaý shyǵyndarynyń ornyn toltyrý kózdelgen.
Alakól kóliniń jaǵalaýyna kóliktik qoljetimdilikti jaqsartýǵa erekshe nazar aýdarylyp otyr. Osy baǵytta uzyndyǵy 8,2 km bolatyn «Qabanbaı aýylynyń aınalmajolyn salý» jobasy ázirlendi, ol eldi mekendegi tranzıttik júktemeni azaıtýǵa múmkindik beredi.
Atalǵan barlyq sharanyń iske asyrylýy avtojol jelisiniń ótkizý qabiletin aıtarlyqtaı arttyryp, ınfraqurylym sapasyn jaqsartyp, týrıstik obektilerge jetý ýaqytyn qysqartady. Bul ishki týrızmdi damytý men jol salasyndaǵy kásipkerlerdi qoldaý úshin jańa múmkindikter týǵyzbaq.
Aıta ketelik 2025 jyldyń qorytyndysy boıynsha Qazaqstannyń týrızm salasy negizgi kórsetkishter boıynsha turaqty ósim kórsetti. El ishinde saıahattaýshylar sany da, shetelden keletin týrıster aǵyny da artty.