Elde turǵyn úı quny qanshalyqty ósti

ASTANA. KAZINFORM — QR Ónerkásip jáne qurylys mınıstrliginiń málimetinshe, turǵyn úıdiń bir sharshy metriniń ózindik qunynda qurylys materıaldarynyń úlesi 57 paıyz shamasynda.

- QR Strategııalyq josparlaý jáne reformalar agenttigi Ulttyq statıstıka bıýrosynyń resmı derekterine qaraǵanda, bıylǵy shilde aıynda el aýmaǵynda turǵyn úıdiń 1 sharshy metriniń ortasha baǵasy mynany qurady: bastapqy naryq – 528,5 myń teńge (2024 jylǵy shildede – 488,8 myń teńge), al qaıtalama naryq – 551,9 myń teńge (2024 jylǵy shilde aıynda – 511,4 myń teńge). 2025 jyldyń shilde aıynda bastapqy turǵyn úı baǵasy osy jyldyń qańtar aıyna qaraǵanda 5,7 paıyzǵa, qaıtalama naryqtaǵy turǵyn úı baǵasy 4,7 paıyzǵa ósýi baıqaldy, - delingen mınıstrliktiń Kazinform agenttigine bergen jaýabynda.

Jyljymaıtyn múlik naryǵy – bul halyqtyń suranysy men usynysyna baılanysty ózin-ózi retteıtin naryq. Jeke kásipkerlik sýbektileri Kásipkerlik kodeksiniń 26-baby 1-tarmaǵynyń 4-tarmaqshasyna sáıkes, óndiriletin taýarlarǵa, jumystarǵa, kórsetiletin qyzmetterge baǵalardy derbes belgileýge quqyly.

- Turǵyn úı baǵasy kóptegen faktorlarǵa baılanysty qalyptasady. Máselen, jer ýchaskesiniń qunyna, ınfraqurylymnyń, ınjenerlik jelilerdiń bolýyna, ornalasqan jerine, halyq arasyndaǵy suranysyna jáne qurylystyń ózindik qunyna qaraı eskeriledi. Turǵyn úıdiń bir sharshy metriniń ózindik quny birneshe komponentterden turady: qurylys materıaldary – 57%, eńbekaqy tóleý qory – 17%, jer ýchaskesin satyp alý – 9%, qurylys tehnıkasy – 6%, ınfraqurylym júrgizý – 3%, aýmaqty abattandyrý – 2%. Sonymen qatar, 1 sharshy metr turǵyn úı salý men satýdyń baǵa parametrleri máselesi jeke qurylys salýshylardyń marketıngtik saıasatyna jatady. Olar jobany iske asyrý protsesinde salynǵan shyǵyndardyń rentabeldiligi men qaıtarymdylyǵyna, sondaı-aq kásiporynnyń qarjylyq turaqtylyǵyn qamtamasyz etýge súıene otyryp, derbes anyqtaıdy. Memleket tek memlekettik turǵyn úı men memlekettik ınvestıtsııalar esebinen salynyp jatqan áleýmettik obektilerdiń baǵasyn retteıdi, - dep atalyp ótken vedomstvo aqparatynda.

Memlekettik turǵyn úı úshin taza árleý quny (ınjenerlik jelilerdiń qunynsyz) turǵyn úı salý jáne (nemese) satyp alý aǵymdaǵy jylǵa bekitilgen Ǵımarattar men qurylystardy salý qunynyń irilendirilgen kórsetkishteriniń jınaqtarynda árbir óńir úshin kózdeletin tıisti qabattaǵy iri paneldi turǵyn úı boıynsha ÓBJJniń 80% mólsherinde aıqyndalady (Qazaqstan Respýblıkasy Ónerkásip jáne qurylys mınıstriniń 2023 jylǵy 22 jeltoqsandaǵy №151 buıryǵy).

Buǵan deıin elimizdegi otandyq qurylys materıaldarynyń úlesi jaıynda jazǵan edik.

Eske sala ketsek, 2025 jylǵy 25 shildede Prezıdent kóppáterli turǵyn úılerdi basqarý júıesin jetildirýge baǵyttalǵan qujatqa qol qoıdy.