Elde otandyq farmatsevtıkalyq ónimderge suranys artyp keledi
ASTANA. KAZINFORM – Qazaqstanda keıingi úsh jylda otandyq farmatsevtıkalyq ónimderdi satyp alý kólemi 38%-ǵa artty. Bul týraly QR Densaýlyq saqtaý vıtse-mınıstri Tımýr Muratov OKQ alańynda ótken baspasóz konferentsııasynda málim etti.
Onyń aıtýynsha, qazirgi ýaqytta 31 otandyq óndirýshimen 83 uzaq merzimdi kelisimshart jasalǵan.
– Sońǵy úsh jylda satyp alynatyn otandyq farmatsevtıkalyq ónim kólemi 38,1%-ǵa ósip, 2024 jylǵy 703 túrli dári-dármek pen medıtsınalyq buıymnan 2026 jyly 971 túrge deıin jetti, - dedi Tımýr Muratov.
Vıtse-mınıstrdiń málimetinshe, 2025 jyly Biryńǵaı dıstrıbıýtor arqyly satyp alynǵan otandyq ónimniń aqshalaı úlesi jalpy kólemniń 32%-yn quraǵan. Al 2027 jylǵa qaraı bul kórsetkishti 34%-ǵa deıin jetkizý josparlanyp otyr.
Sondaı-aq qazaqstandyq farmatsevtıkalyq ónim óndirisin damytý maqsatynda jalpy somasy shamamen 360 mlrd teńgege 7 ınvestıtsııalyq kelisim jasalǵan. Onyń aıasynda otandyq kompanııalardyń ónim óndirý kólemin ulǵaıtý kózdelip otyr.
Eske salaıyq, buǵan deıin Qazaqstanda dári-dármekke qatysty shaǵymdar 18%-ǵa azaıǵany habarlanǵan edi.
