Biz qoldaıtyn barlyq jobada jergilikti ónimge basymdyq beriledi — Bektenov

ASTANA. KAZINFORM — Oljas Bektenov ekinshi deńgeıli bankterdiń basshylarymen ekonomıkanyń naqty sektoryn qarjylandyrýǵa qatysýdy arttyrý máselesin talqylady. Bul týraly Úkimettiń baspasóz qyzmeti habarlady. 

Premer-mınıstr Oljas Bektenov Memleket basshysynyń ekonomıkanyń naqty sektoryn ekinshi deńgeıli bankterdiń qarjylandyrýyn ulǵaıtý jónindegi tapsyrmasyn oryndaý máseleleri boıynsha keńes ótkizdi. Іri ınfraqurylymdyq jobalardy salý jáne jańǵyrtý baǵdarlamalaryn júzege asyrýǵa nazar aýdarylyp otyr.

Úkimettiń bıznesti basymdyq bere qarjylandyrýǵa bankterdiń qatysýyn yntalandyrý boıynsha jańa tásilderi qaraldy.

Vıtse-premer — ulttyq ekonomıka mınıstri Serik Jumanǵarın EDB aktıvteriniń tek 21,2%-y bıznesti nesıelendirýge tıesili, 16,5%-dan astamy kepilsiz tutynýshylyq nesıelerdi quraıtynyn, ótimdiligi joǵary aktıvterdiń úlesi 29,6%-ǵa deıin óskenin baıandady.

Jańa Salyq kodeksi jobasynda korporatıvtik sektordy nesıeleýden túsetin kirister boıynsha KTS mólsherlemesin 20% deńgeıinde saqtaý, al tutyný sektory úshin 25%-ǵa belgileý jáne birqatar qarjylyq operatsııaǵa qatysty shamamen 500 mlrd teńge bolatyn QQS jeńildikterin alyp tastaý usynylady. Bul sharalar salyq tólemderin ulǵaıtýǵa, salyq júktemesin teńestirýge jáne bankter aktıvteriniń qurylymyn teńestirýge, olardyń resýrstaryn naqty ekonomıkaǵa baǵyttaýǵa arnalǵan.

Áleýetti JІÓ shegin maqsatty túrde arttyrý strategııalyq maqsat bolýy tıis. Bul orta jáne uzaqmerzimdi kezeńde Qazaqstan ekonomıkasynyń ónimdiligin arttyrý úshin ınvestıtsııalardy qandaı baǵyttarǵa shoǵyrlandyrý kerek ekenin jáne qandaı ınstıtýtsıonaldyq qoldaý qajettigin túsinýge múmkindik beredi.

«Báıterek» UBH» AQ basqarma tóraǵasy Rýstam Qaraǵoıshın kásipkerlikti qoldaý men nesıeleýdiń negizgi quraldaryn usyndy. 2024 jyly Holdıngtiń ekonomıka sektorlaryn qoldaýǵa qosqan jalpy úlesi shamamen 4 trln teńge boldy. 2025 jyly osy maqsattarǵa qol jetkizý úshin qarjylandyrý kólemin 2027 jylǵa qaraı 10 trln teńgege deıin odan ári ulǵaıta otyryp, shamamen 8 trln teńge baǵyttaý josparlanyp otyr. EDB-ny naqty sektordy qarjylandyrýǵa tartý sheńberinde ótimdilikti arttyrýǵa baǵyttalǵan birqatar sharalar usynylady.

84 iri ınvestıtsııalyq jobany iske asyrý kózdelgen. Óndiris, ınfraqurylym jáne turǵyn salalaryna basymdyq beriledi. Memlekettik kepildikter ulǵaıtylady, sonyń nátıjesinde qurylys jumystary 13,1 myń shaqyrym avtojoldar men 585 shaqyrym temirjoldardy qamtıdy. Energetıkalyq jáne kommýnaldyq sektorlardy jańǵyrtý jónindegi ulttyq joba sheńberinde 5 jylda 13 trln teńgeden astam, onyń ishinde bıyl — 1,2 trln teńge ınvestıtsııa salynady. Turǵyn úı qurylysynyń rekordtyq kórsetkishi — keminde 19 mln sharshy metr salý kútilýde. Naqty sektordy qarjylandyrýdy ulǵaıtýǵa baǵyttalǵan bastamalar JІÓ-niń ósýine ákeledi.

Óz kezeginde, Qazaqstan qarjygerler qaýymdastyǵynyń tóraǵasy Elena Bahmýtova EDB ekonomıkaǵa nesıe berý kólemin arttyrýdy jalǵastyryp jatqanyn aıtty. 2024 jyly bıznes-qaryz alýshylardyń jalpy sany 441-den 532 myńǵa deıin ósti. Bank sektory jyldyń birinshi aıynda iskerlik belsendiliktiń dástúrli baıaýlaýyna qaramastan, tek qańtar aıynyń ózinde 1,1 trln teńge jańa nesıe berdi.

Talqylaý qorytyndysy boıynsha Premer-mınıstr ekonomıkany qarjylandyrý boıynsha jańa tásilderdi birlesip engizýdiń mańyzdylyǵyn atap ótip, bank basshylyǵynyń nazaryn jergilikti qamtý máselesine aýdardy.

— Prezıdent Úkimettiń keńeıtilgen otyrysynda iri ınfraqurylymdyq jobalardy salý jáne jańǵyrtý úshin ekinshi deńgeıli bankter resýrstaryn paıdalaný mindetin qoıdy. «Báıterekti» kapıtaldandyrýdy ulǵaıtý ekonomıkaǵa, onyń ishinde ekinshi deńgeıdegi bankter arqyly úlken ótimdilikti tartýǵa baǵyttalǵan. Bul osy jáne keıingi jyldary el ekonomıkasynyń damýyna eleýli serpin beredi. Bul baǵdarlama barynsha tıimdi bolýy úshin banktermen birlese, úılesimdi jumys isteý mańyzdy. Biz ashyq jumys isteýge daıynbyz, qarjylandyrý ekinshi deńgeıli banktermen birlesip, damý ınstıtýttary óz kezeginde buǵan kómektesetin barlyq tetikterin kórsetemiz. Biz qoldaıtyn barlyq jobada jergilikti qamtýǵa basymdyq beriledi. Árbir jobany jiti qaraıtyn bolamyz: Qazaqstanda óndiriletin taýarlardyń barlyǵy syrttan ımporttalmaı, ózimizde satyp alynýy tıis. Bul jumys tsıfrlyq formatta júrgizilýi kerek. Memlekettiń kómegimen jeńildikti mólsherlemeler boıynsha belgili bir jobany iske asyryp jatqan kásipker qazaqstandyqtardan satyp alýy qajet, — dep atap ótti Premer-mınıstr.

Aıta ketelik keshe Prezıdent Oljas Bektenovke ekonomıkanyń naqty sektoryn qoldaýdy tapsyrǵan edi.