Qazaqstanda munaı óńdeý kólemi 39 mln tonnaǵa deıin ulǵaıtylmaq
ASTANA. KAZINFORM – Qazaqstan men QHR Shymkent munaı óńdeý zaýytynyń qýattylyǵyn 12 mln tonnaǵa deıin keńeıtý jobasyn ázirleýge kiristi. Bul týraly Energetıka mınıstrliginiń baspasóz qyzmeti habarlady.
Energetıka mınıstrliginiń delegatsııasy Munaıdy tasymaldaý jáne óńdeý departamentiniń dırektory Dáýlet Aryqbaevtyń bastaýymen Tsındao qalasynda (QHR) Shymkent MÓZ («PKOP» JShS) óndiristik qýattylyǵyn jylyna 12 mln tonnaǵa deıin keńeıtý jobasynyń tehnıkalyq-ekonomıkalyq negizdemesin ázirleýge arnalǵan strategııalyq keńeske qatysty.
Kezdesý barysynda taraptar jobany iske asyrýdyń negizgi parametrlerin bekitti: «PKOP» JShS bastapqy derekter paketin usyndy, al Shyǵys Qytaı jobalaý ınstıtýty bekitilgen tehnıkalyq tapsyrmaǵa sáıkes jumystardy bastaýǵa daıyn ekendigin rastady.
Kelissózderdiń basty nátıjesi — zaýytty keńeıtýdiń «6+6» syzbasy boıynsha (árqaısysy 6 mln tonnadan bolatyn eki tehnologııalyq jeli) konfıgýratsııasyn bekitý boldy. Bul jańa qýattardy kásiporynnyń jumys istep turǵan nysandarymen tolyq ıntegratsııalaýdy qamtamasyz etedi. Jobalaý jumystaryna buǵan deıin kelisilgen tehnıkalyq tapsyrma men TEN aldyndaǵy esep negiz bolyp alyndy.
Jıynǵa qatysýshylar jumys kestesin saqtaýdyń mańyzdylyǵyn atap ótip, TEN-niń negizgi bóligin Negizdemelik kelisimde kózdelgen merzimde aıaqtaý qajettigine nazar aýdardy.
Keńes qorytyndysy boıynsha jobanyń belsendi tehnıkalyq pysyqtaý kezeńine ótkenin aıqyndaıtyn tıisti hattamalarǵa qol qoıyldy.
Jalpy alǵanda, Qazaqstandaǵy úsh MÓZ-di keńeıtý sheńberinde munaı óńdeý kólemin jylyna 18-den 39 mıllıon tonnaǵa deıin ulǵaıtý josparlanyp otyr. Sonymen qatar, qýattylyǵy jylyna 10 mıllıon tonnaǵa deıingi jańa munaı óńdeý zaýytyn salý úshin áleýetti ınvestorlardy tartý boıynsha jumys istelip jatyr.
Aıta ketelik Qazaqstan jáne OPEK+ uıymyna múshe taǵy jeti el munaı óndirisin kóktemge deıin ózgerissiz qaldyrǵan edi.