Elde qoıshylar men baqtashylardyń zeınet jasyn tómendetpek
ASTANA. KAZINFORM — Aýyl sharýashylyǵy mınıstrliginde agroónerkásiptik keshendi damytý máseleleri boıynsha Qoǵamdyq keńestiń otyrysy ótti. Bul týraly AShM baspasóz qyzmeti habarlady
Oǵan Aýyl sharýashylyǵy mınıstri Aıdarbek Saparov, salalyq qurylymdardyń, ǵylymı jáne saraptamalyq qaýymdastyqtyń ókilderi qatysty.
Otyrys barysynda Qoǵamdyq keńestiń 2026 jylǵa arnalǵan jumys jospary bekitilip, qoǵammen jáne kásibı qaýymdastyqpen ózara is-qımyldyń negizgi baǵyttary aıqyndaldy.
Kún tártibindegi basty másele — 2026–2030 jyldarǵa arnalǵan mal sharýashylyǵy salasyndaǵy agrobıznesti damytýdyń Keshendi jospar jobasyn talqylaý.
Qujat Memleket basshysynyń tapsyrmasy boıynsha ázirlendi. Ol óndiris kólemin arttyrýǵa, ónimdilikti kúsheıtýge jáne salanyń eksporttyq áleýetin keńeıtýge baǵyttalǵan. Jobany daıyndaýǵa Parlament depýtattary, oblys ákimderiniń orynbasarlary, ǵylym, qarjy sektory men bıznes ókilderi, sonyń ishinde «Atameken» UKP músheleri qatysyp, belsendi atsalysty.
Jumys barysynda 9 otyrys ótkizilip, 154 usynys qaraldy.
Aýyl sharýashylyǵy vıtse-mınıstri Amanǵalı Berdalın Keshendi jospar jobasy ózara tyǵyz baılanysty ekenin ári shynaıy tájirıbege baǵyttalǵan sharalar toptamasyn qamtıtynyn atap ótti.
— Qujatta mal sharýashylyǵyn qarjylandyrý tetikterin qalyptastyrýǵa basa nazar aýdarylǵan. Atap aıtqanda, janýarlardyń barlyq túrleri boıynsha asyl tuqymdy maldy satyp alýǵa jyldyq 6% mólsherlememen uzaq merzimdi jeńildetilgen kredıt berý baǵdarlamasyn iske qosý kózdelgen.
Aınalym qarajatyn tolyqtyrý úshin mal sharýashylyǵynyń ishki salalaryna shekteý qoıylmaı, 5% mólsherlememen kredıt berý tetigin engizý josparlanýda. Qarajat jem-shóp satyp alýǵa, janar-jaǵarmaı materıaldaryna, veterınarııalyq preparattarǵa jáne basqa da óndiristik shyǵyndarǵa baǵyttalýy múmkin, — dedi vıtse-mınıstr.
Paıdalanylmaı jatqan jaıylymdardyń áleýetin iske qosý maqsatynda kóshpeli (otgondy) mal sharýashylyǵyn damytý úshin 6% mólsherlememen biryńǵaı kredıttik ónim qurý kózdelgen.
Barlyq kredıttik baǵdarlamany ósimdik sharýashylyǵynda qoldanylatyn tetikterge uqsas «Damý» ınstıtýty arqyly memlekettik kepildik júıesimen qamtamasyz etý josparlanyp otyr.
Keshendi jospardyń taǵy bir bóligi mal sharýashylyǵy shıkizatyn tereń óńdeýdi damytýǵa, veterınarııalyq qaýipsizdik máselelerine jáne tsıfrlyq baqylaýǵa arnalǵan. Qujatta salany bilikti kadrlarmen qamtamasyz etý boıynsha sharalar kózdelgen. Mal sharýashylyǵy ókilderin áleýmettik qoldaý máseleleri de qarastyrylǵan, onyń ishinde qoıshylar men baqtashylar úshin zeınetkerlik jasty tómendetý, olardyń balalaryna bilim berý granttaryn basym tártippen bólý, ásker qataryna shaqyrýdy keıinge qaldyrý usynylady.
Talqylaý barysynda Qoǵamdyq keńes músheleri egin sharýashylyǵy sýbektilerin mal sharýashylyǵyna tartý, jaıylymdyq jem-shóp óndirisin damytý, qazaqtyń aqbas jáne áýlıekól tuqymdaryn qoldaýdy kúsheıtý, ishki naryqty sapasyz ónimnen qorǵaý, malshylar úshin turǵyn úı qurylysyna sýbsıdııa berý jáne basqa da usynystardy alǵa tartty.
— Joba fermerler pikirin eskere otyryp ázirlendi. Biz salanyń damýyna serpin beretin barlyq usynys, pikirlerimizdiń qujatta eskerilgenin kórip otyrmyz. Keshendi jospar jobasy agroónerkásiptik keshendi damytýdyń ornyqty modelin qalyptastyrýǵa jáne mal sharýashylyǵy salasyndaǵy agrobıznesti júıeli qoldaýǵa negiz bolady dep senemiz, — dedi kópshiliktiń atynan ortaq pikir bildirgen respýblıkalyq QazaqSut sút jáne aralas iri qara tuqymdary palatasynyń dırektory Azamat Saǵynbaev.
Talqylaý qorytyndysy boıynsha Qoǵamdyq keńes músheleri Keshendi jospar jobasyn biraýyzdan maquldady.
Aıta ketelik iri qara mal etine qatysty jańa shekteýlerdiń qoldanylý tártibi qandaı ekenin jazǵan edik.