Elde qansha áıel IT mamandyǵyn tegin meńgerdi
ASTANA. KAZINFORM — Bıyl IT-Aiel jobasy aıasynda 4 myńnan astam áıel qarjylyq, tsıfrlyq saýattylyǵyn arttyrdy. Olardyń arasynda Qyrǵyzstan, Túrkııa, Ózbekstandaǵy qandastar da bar.
IT-Aiel jobasy Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııasy, Technowomen kommertsııalyq emes uıymy men Astana Hub tehnoparkiniń qoldaýymen iske asyrylyp jatyr. Bıyl 4 myńnan astam áıel biliktiligin arttyrdy.
— Áıelder qazirdiń ózinde ǵylym men bilimde alda. Magıstranttardyń 57 paıyzy, doktoranttardyń 61 paıyzy áıel. Aqparattyq-tehnologııalyq kommýnıkatsııa salasyna qyzdar kóbirek kelip jatyr. Telekomda 46%, aqparattyq qaýipsizdikte 30%, zertteýshilerde 55% áıel. Áıelder qurǵan startap 23%-ǵa jetti. Bul eldiń úlken adamı kapıtaly. Ony joǵaltpaı, kerisinshe damyta berýimiz kerek. Bıyl AqylTech pen IT Aiel baǵdarlamalary úshin serpilis jyly boldy. El boıynsha 11 myńnan asa adam onlaın jáne offlaın oqydy. Jalpy úsh jylda 21 myńnan astam áıel tsıfrlyq saýattylyǵyn arttyrdy, — dedi QR Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń múshesi Azıza Shójeeva.
Onyń aıtýynsha, buǵan deıin Almaty men Astana, Qaraǵandy qalalarynyń áıelderi belsendi bolsa, bıyl Batys Qazaqstan, Almaty oblystarynda JI jolyn úırengender kóp kezdesti. Kóbi 36-45 jas aralyǵyndaǵy áıelder.
— IT Aiel jobasyna qatysqan áıelderdiń kóbi úı sharýashylyǵynda otyrǵandar men ýaqytsha tabysy bar adamdar. Bıyl jobaǵa qatysqandardyń 19 paıyzǵa jýyǵy 45 jastan asqandar. Sonymen birge zeınet jasyna jaqyndaǵan áıelder de tsıfrlyq saýattylyǵyn arttyryp qana qoımaı, tabys tabýdy úırendi. Tek el ishinde turatyndar emes, Ózbekstan, Túrkııa, Qyrǵyzstandaǵy qandastarymyz onlaın bilim alyp, jańa jobalardy ıgerýge múmkindik aldy. Áleýmettik jeli arqyly bilip, kórip, qatysty. Keler jyly aýqymyn keńeıtýdi josparlap otyrmyz. Sebebi sarapshylar, mentor, trenerler de bilikti mamandar. Olardan kóp nárse úırenýge bolady. Onlaın tirkelgen soń ózine yńǵaıly ýaqytta oqyp, úırenýge jaǵdaı jasaldy, — dedi Azıza Shójeeva.
IT Aiel jobasy keler jyly jalǵasady. Jobaǵa ótinish qabyldaý jyl basynda bastalady. Keler jyly vaıb-kodıngke basymdyq beriledi. Bul degenimiz saıt pen mobıldi qosymsha daıyndaý joly. Oǵan JI paıdalanýǵa bolady jáne tabys tabýdy úıretedi.
Technowomen keńesiniń múshesi Alýa Kórpebaevanyń aıtýynsha, joba úsh bólimnen turdy. Olar: qarjylyq, tsıfrlyq saýattylyq pen kıberqaýipsizdik, kıberbýllıng.
— Baǵdarlama arqyly 1300-den astam áıel jańa mamandyqty ıgerip, tabysyn arttyrdy. Olar iri kompanııalarǵa jumysqa ornalasty. Oqyp, biliktiligin arttyrǵan áıelderdiń 36%-y óte jaqsy nátıjege qol jetkizip otyr. Qarjylyq saýattylyq bóliginde kásip bastaý, ony júrgizýdi úırendi. Al ІT bóliminde JI-di úırenip, dızaın jasady. Chat-bot jasaýdy meńgerdi. Kıberqaýipsizdikte balalardy, zeınetkerlerdi qorǵaý jolyn bildi, — dedi Alýa Kórpebaeva.
Eske salsaq, 2023 jyly Astana Hub Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııamen birlesip IT salasynda jumys istegisi keletin áıelderdi oqytýdy bastady. Sol jyly 2307 áıel IT-Aiel baǵdarlamasy boıynsha IT mamandyqtarǵa oqýǵa ótinish berdi.