Elde qandaı dárilik preparattar arzandady
ASTANA. KAZINFORM – Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti patsıentterdiń qarjylyq júktemesin azaıtý jáne negizsiz ústemeaqylardy boldyrmaý maqsatynda dárilik preparattarǵa shekti baǵalardy qalyptastyrý tetigin engizdi.
Nátıjesinde bólshek saýdada satylatyn shamamen 5 000 dárilik zattyń baǵasy qaıta qaraldy. Bul tizimge júrek-qan tamyrlary júıesiniń sozylmaly aýrýlaryn, tynys alý organdarynyń aýrýlaryn, ınfektsııalyq aýrýlardy jáne basqa da keń taralǵan jaǵdaılardy emdeýge arnalǵan preparattar engizildi.
Bul kóptegen qazaqstandyqqa kúndelikti qajet dárilerdiń endi anaǵurlym qoljetimdi bolatynyn bildiredi.
Qazirgi ýaqytta 4 994 saýda ataýyna shekti baǵalar belgilengen, al farmatsevtıkalyq qyzmet sýbektileri dárilik zattardy belgilengen shekti deńgeıden aspaıtyn baǵamen satýǵa mindetti.
Sonymen qatar, 1 707 retseptisiz beriletin preparat memlekettik retteýden shyǵarylyp, naryqtyq qaǵıdattar boıynsha satylyp jatyr.
Elimizdiń 20 óńirinde júrgizilgen monıtorıng qorytyndysy boıynsha, 2026 jylǵy naýryzda 2025 jylǵy maýsymmen salystyrǵanda 631 ataý boıynsha baǵalar orta eseppen 24,6%-ǵa tómendegeni tirkeldi. Atap aıtqanda, kelesi dárilik preparattar boıynsha aıtarlyqtaı tómendeý baıqaldy:
— Prenessa®️, 8 mg № 30, tabletkalar — 18,3%-ǵa;
— Sıalıs®️, 20 mg № 1, tabletkalar — 16,5%-ǵa;
— Tamıflıý®️, 75 mg № 10, kapsýlalar — 14,5%-ǵa;
— Perındoprıl-Teva, 5 mg № 10, tabletkalar — 24,3%-ǵa;
— Entekavır Vıva Farm, 0,5 mg № 30, tabletkalar — 20,0%-ǵa tómendedi.
️ Komıtet tarapynan elimizdiń barlyq óńirinde baǵa jaǵdaıyna turaqty monıtorıng júrgizilip jatyr.
Belgilengen shekti baǵalardan asyp ketý faktileri anyqtalǵan jaǵdaıda, Qazaqstan Respýblıkasynyń Ákimshilik quqyq buzýshylyq týraly kodeksiniń 426-babyna sáıkes jaýapkershilik qarastyrylǵan.
Azamattar baǵa belgileý boıynsha yqtımal zańbuzýshylyqtar týraly DariKZ mobıldi qosymshasy arqyly habarlaı alady nemese Medıtsınalyq jáne farmatsevtıkalyq baqylaý komıtetiniń óńirlik departamentterine júginýine bolady.
Aıta ketelik qazaqstandyqtar qandaı preparattardy jıi satyp alatyny týraly jazǵan edik.