Elde qandaı azyq-túlik pen qyzmet túriniń baǵasy ózgerdi

ASTANA. KAZINFORM – 2025 jylǵy sáýirde tutyný baǵalarynyń aılyq ındeksi 1,2% (2025 jylǵy naýryzda – 1,3%). Aqyly qyzmetterdiń baǵasy – 1,9%, azyq-túlik taýarlary– 1,1%, azyq-túlik emes taýarlar 0,6% ósti.

— Tarıfter turǵyn úı-kommýnaldyq qyzmetter salasynda qoqys shyǵarýǵa 4,5% ósti. Monsha qyzmetteri — 5%, shashtarazdar men sulýlyq salondary qyzmetteri — 2,6%, qoǵamdyq tamaqtaný qyzmetteri 2% qymbattady. Baǵalar ınternet-baılanys jáne kınoteatrlar qyzmetterine — 4%-dan, sanatorıı qyzmetterine — 3,8%, medıtsınalyq zerthanalar men rentgen kabınetteri qyzmetterine — 2,5%, stomatologııalyq qyzmetterge 2,1% ósti, — delingen Ulttyq statıstıka habarlamasynda.

Baǵasy ósken azyq-túlikter

Azyq-túlik taýarlarynan baǵa qyryqqabat — 20,2%, qyzylsha — 11,7%, basty pııaz — 11,5%, sábiz — 9,2%, kartop, lımon — 7,1%-dan, záıtún maıy — 6,6%, júzim — 6,5%, tátti burysh — 5,9%, tuzdalǵan maıshabaq — 4%, qoı eti — 3,3%, sıyr eti, qant 2,2%-ǵa ósti.

Baǵasy tómendegen azyq-túlikter

Baǵa qııar — 14,3%, qyzanaq — 5%, suly jarmasy — 4,3%, apelsın — 2%, kúrish — 0,4%, jumyrtqa 0,3%-ǵa tómendedi.

— Sáýir aıynda baǵanyń altyn neke saqınasy — 2,3%, kıim men aıaq kıim — 1%, dári-dármekter 0,5%-ǵa ósýi baıqaldy. Dızel otyny 1,1% qymbattady, — delingen habarlamada.

Óńirler ishinde eń joǵary aılyq ınflıatsııa Túrkistan oblysynda jáne Almaty, Shymkent qalalarynda — 1,5% (ortasha respýblıkalyq deńgeıden 0,3 p. t. joǵary), eń tómeni Aqmola oblysynda 0,7% tirkeldi.

Óńirler bólinisinde bárinen buryn baǵalar azyq-túlik taýarlaryna Soltústik Qazaqstan oblysynda 1,9%, azyq-túlik emes taýarlarǵa — Qyzylorda oblysynda 1,1%, aqyly qyzmetterge — Túrkistan oblysynda 3,7% ósti.

2025 jylǵy sáýirde jyldyq mánde ınflıatsııa deńgeıi 10,7%. Baǵalar aqyly qyzmetterge — 15,7%, azyq-túlik emes taýarlarǵa — 8,9%, azyq-túlik taýarlaryna 8,5% joǵarylady.

Aıta ketelik Ulttyq bank mamyr aıynda Ulttyq qordan 1 mlrd dollar satýy múmkin.