Elde 6 aqpan kúni dabyl sırenalary iske qosylady

ASTANA. KAZINFORM –  Tótenshe jaǵdaılar mınıstrligi 6 aqpan kúni tańerteń elimizdiń keıbir óńirlerinde dabyl sırenalary qosylatynyn eskertti. 

- «Barshanyń nazaryna!» dabyly boıynsha aýmaqtyq deńgeıdegi qulaqtandyrý júıesiniń daıyndyǵyn tekserý maqsatynda 2025 jylǵy 6 aqpanda, saǵat 11.00-de barlyq dybystyq elektr dabyly qosylady. Osyǵan oraı tynyshtyq saqtaýlaryńyzdy jáne úreıge boı aldyrmaýlaryńyzdy suraımyz, - delingen TJM taratqan habarlamada.

Sonymen qatar 6-7 aqpanda elimizdiń ońtústik jáne batys óńirlerinde «Sý tasqyny kezeńi jaǵdaılaryndaǵy tótenshe jaǵdaılardy joıý kezindegi is-qımyldarǵa azamattyq qorǵaýdyń memlekettik júıesiniń basqarý organdaryn, kúshteri men quraldaryn daıyndaý» taqyryby boıynsha «Kóktem-2025» respýblıkalyq komandalyq-shtabtyq oqý-jattyǵýdyń 1-shi kezeńi ótedi.

Oqý úılestirý jáne jetekshilik etý jónindegi respýblıkalyq shtab Atyraýda ornalasady. Oqý-jattyǵý sheńberinde eki kún boıy Almaty, Shymkent qalalarynda, Almaty, Atyraý, Aqtóbe, Batys Qazaqstan, Jambyl, Qyzylorda, Mańǵystaý, Túrkistan jáne Jetisý oblystarynda profılaktıkalyq is-sharalar kesheni ótkiziledi.

Eske salsaq, jer silkingende ala shyǵatyn «dabyl shabadanyna» ne salý keregi týraly jazǵan bolatynbyz.