«Elbasynyń jahandyq bastamasy qoldaý tabatynyna senim mol» - baspasózge sholý
***
Keshe Ortalyq kommýnıkatsııalar qyzmetinde Májilis depýtaty, «Qazaqstan mashına jasaýshylar odaǵy» ZTB basqarma tóraǵasy Meırambek Pishembaev baspasóz máslıhatyn ótkizdi. Onda Astanada eki kún boıy ótken mashına jasaýshylar forýmynyń qorytyndylary týraly aıtty. Bul jaıynda «Egemen Qazaqstan» gazetiniń senbilik sanyndaǵy «Mashına jasaý salasyna jańa baǵdarlama qajet» degen taqyryptaǵy maqalada keńinen baıandalǵan. Basylymnyń jazýynsha, baspasóz máslıhatynda saladaǵy bilikti kadrlardyń jetispeýshiligi de eń ózekti máseleniń biri ekeni aıtyldy. «Elimizde mashına jasaý salasynda bilikti kadrlardyń jetispeıtinin moıyndaımyz. Sondyqtan, búgingi kúnde dýaldy bilim berý júıesi boıynsha osy máseleni sheshýdi qolǵa myqtap alyp jatyrmyz. Bul maqsatta júıeli jumystar atqarylyp jatyr deýge bolady. Degenmen, áli de jetkiliksiz deńgeıde ekeni ókinishti. Osyǵan oraı, eldegi bilim berý oryndary, ýnıversıtettermen, kolledjdermen birlesip dýaldy júıe boıynsha kadr daıyndaý máselesin qolǵa alǵan jón. Sebebi, qazir mamandar jetispeýshiligi kún sanap ulǵaıyp keledi. Al búginde oqý ornyn támamdap jatqan mamandardyń basym bóligi qarjy, ekonomıka salasynyń dıplomdaryn alyp shyǵýda. Tehnıkalyq mamandar ınjenerler, konstýktorlar, tehnologtar az. Al bizge keregi osy mamandyqtar. Sondyqtan, mektep oqýshylaryna osy mamandyqtardy tańdaýǵa keńes berý kerek. Qazir atalǵan salaǵa memlekettik grant ózge salaǵa qaraǵanda, kóp bólinip júr», - dedi depýtat.
Elbasy N.Nazarbaev Birikken Ulttar Uıymy Bas Assambleıasynyń sessııasynda sóılegen sózinde qazirgi álemdegi oryn alyp otyrǵan úrdisterdi jan-jaqty saralap, jahandyq problemalardy kótergendigi elimiz úshin úlken maqtanysh sezimin týdyrǵany ras. Osyǵan oraı, «Egemen Qazaqstan» gazeti Parlament Májilisiniń Halyqaralyq ister, qorǵanys jáne qaýipsizdik komıtetiniń múshesi Ersultan Bekturǵanovpen áńgimelesken. Basylym tilshisiniń saýaldaryna tuşymdy jaýap bergen ol: «Memleket basshysy BUU qurylymyn da qaıta qarap, bir maqsatqa jumyldyrý jaǵyn kóterdi. Atalǵan halyqaralyq beldi Uıymnyń ishinde kóptegen qurylymdar bar. Dúnıejúzi boıynsha olardyń kóptegen ofısteri bar ekenin taǵy bilemiz. Eger Uıymnyń shtab-páteri Azııaǵa kóshirilip, onyń qurylymdary qaıta jandanatyn bolsa, onda Jer sharyndaǵy kóptegen elderge onyń paıdasy biliner edi. Tipti, iri basylymdardyń ózi bul málimdemelerdi jazǵany elimiz úshin úlken jetistik. Onyń ústine Prezıdent úlken minberdi paıdalanyp, barshany 2017 jyly Qazaqstanda ótetin halyqaralyq EKSPO kórmesine qatysýǵa shaqyrdy», - deıdi. Suhbat «Utymdy usynystar jahandyq problemalardy utqyr sheshý úderisterimen ushtasyp jatyr» degen taqyryppen berilgen.
***
Qazaqstan Respýblıkasynyń Prezıdenti Nursultan Nazarbaev Birikken Ulttar Uıymy Bas assambleıasynyń mereıtoılyq sessııasynda sóılegen sózinde jalpy álemdik qoǵamdastyqqa ortaq máselelerdi kóterip, álem elderi birigip júzege asyrýy tıisti ǵalamdyq usynystardy ortaǵa saldy. Elbasy usynǵan sondaı iri usynystardyń biri de biregeıi BUU-nyń ıadrolyq qarýdan azat álemge qol jetkizý jónindegi Jalpyǵa ortaq deklaratsııasyn qabyldap, jahandyq antııadrolyq qozǵalys qurý. Elbasynyń osynaý usynysy týraly memleket jáne qoǵam qaıratkerleri de óz oılaryn bildirýde. Olardyń bir parasy «Aıqyn» gazetiniń senbilik sanynda «Elbasynyń jahandyq bastamasy qoldaý tabatynyna senim mol» degen ortaq taqyryppen jarııa etildi. Máselen, Májilis depýtaty Baqytjan Ertaev bylaı deıdi: «Al Ult kóshbasshysy Nursultan Nazarbaevtyń ıadrolyq qarýdan azat álemge qol jetkizý týraly Jalpyǵa ortaq deklaratsııany qabyldap, jahandyq antııadrolyq qozǵalys qurýdy Birikken Ulttar Uıymynyń bıik minberinen usynýyn Elbasynyń ǵalamdyq qaýipsizdikti qamtamasyz etip ǵana qoımaı, álem turǵyndarynyń beıbit ómir súrýine jaǵdaı jasaý kerektigi jóninde búkil dúnıejúzine jarııa etilgen dabyl retinde qabyldaýǵa bolady. Eń bastysy, Elbasy Nursultan Ábishulynyń bıik minberden usynǵan salıqaly da salaýatty usynystaryn álem elderiniń basshylary men múıizi qaraǵaıdaı saıasattanýshy ǵalymdary joǵary baǵalap, ózderiniń oı-pikirlerin ashyq bildirýde. Demek, Qazaqstan basshysynyń ǵalamdyq mańyzy bar usynystary taıaý bolashaqty júzege asyrylady degen senimdemin».
«Salyqtardyń tolyq kólemde tólenýi men «kóleńkeli» ekonomıkanyń qysqarýy qazirgi almaǵaıyp shaqta kez kelgen memleketti úlken kúızelisten qutqaryp qalmaq. Osy sebepti de Qazaqstan múlik pen kapıtalǵa raqymshylyq jasaýdy jáne zańdastyrýdy taǵy bir jylǵa uzartty, sondaı-aq alda halyqtyń jappaı tabys deklaratsııasyn tapsyrýyn engizbek», - dep jazady «Aıqyn» gazeti senbilik sanyndaǵy «Salyqtyq málimetter bazasy qurylady» degen taqyryptaǵy maqalasynda. Basylymnyń jazýynsha, Qazaqstan Eýrazııalyq ekonomıkalyq odaqqa múshe bes memlekettiń Qazaqstan, Reseı, Belarýs, Qyrǵyzstan jáne Armenııanyń salyq organdarynyń málimetter bazasyn biriktirýdi usyndy. Mundaı bastama keshe Astanada ótken Táýelsiz Memleketter Dostastyǵyna qatysýshy memleketterdiń Salyqtyq (qarjylyq) tergeý organdary basshylarynyń úılestirý keńesiniń 17-otyrysynda kóterildi. Halyqaralyq basqosýdy ashqan Qazaqstan Qarjy mınıstrliginiń Memlekettik kirister komıteti tóraǵasynyń orynbasary Tileý Janǵarashev salyqtan jaltarýshylarǵa halyqaralyq deńgeıde qatań tospa qoıatyn kezeń kelip jetkenin málimdedi. «Kredıttik-qarjylyq saladaǵy qylmystarmen jáne salyq zańnamasyn buzýmen kúreste salyq organdary birigýiniń qajettiligi týyndaýda. Osyǵan oraı Qazaqstan tarapy EEO múshe-memleketteriniń salyq organdarynyń aqparat almasýy boıynsha Memleketaralyq komıssııa qurýdy usynyp otyr», - dedi ol.
