Elbasynyń ómirlik tájirıbesin, parasattylyǵyn paıdalaný kerek - senator

NUR-SULTAN. QazAqparat - Senat depýtaty Álı Bektaev «Qurmetti Senator» mártebesine ıe bolǵan Elbasy Nursultan Nazarbaevtyń ókilettigine baılanysty túsinik berdi, dep habarlaıdy QazAqparat tilshisi.

«Elbasynyń ómirlik tájirıbesin uıymdardyń jumysynda paıdalaný kerek. Ómir tájirıbesi laıyqty tulǵanyń aqylyn da, parasattylǵyn da paıdalanýymyz kerek», - dep toqtaldy depýtat Senattyń jalpy otyrysynan keıin tilshiler saýalyna jaýap bere otyryp.

Osy oraıda ol «Qurmetti Senator» ózge depýtattar sııaqty jalaqy almaıtynyn, bul óz kezeginde qoǵamdyq negizde atqarylatyn qyzmet ekenin jetkizdi.

«Elbasyna «Qurmetti Senator» mártebesiniń berilýinen QR Parlamenti Senaty jumysynyń sapasy da, bedeli de arta túsedi dep oılaımyn. Jalpy, Senattyń jumysynda qosymsha jaýapkershilik paıda bolady degen pikirdemin. Tuńǵysh Prezıdenttiń otyrystarǵa qalaǵan kezde qatysýǵa múmkindigi bar, ıaǵnı mańyzdy zańdar men máselelerdi talqylaý barysynda tıisti usynystardy jasaı alady», - dedi Álı Bektaev.

Budan buryn habarlanǵandaı, búgin QR Parlamenti Senatynyń jalpy otyrysynda Tuńǵysh Prezıdent-Elbasy Nursultan Nazarbaevqa «Qurmetti Senator» mártebesi berildi.