Elbasy Joldaýy otandyq agroónerkásip keshenine jańa serpin beredi - Tilektes Esbolov

ALMATY. QazAqparat - Almatydaǵy Qazaq ulttyq agrarlyq ýnıversıtetiniń rektory Tilektes Esbolov Prezıdent Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń múmkindikteri» joldaýyna qatysty óz pikirin bildirdi, dep habarlaıdy QazAqparat tilshisi.

Joldaýdy túsindirýge Almaty qalasy ákimdiginiń ókilderi, ýnıversıtettiń professorlyq-oqytýshylar quramy men stýdent jastary, ǵylymı-zertteý ınstıtýttarynyń mamandary, kórnekti ǵalymdar, jýrnalıster qatysty.

Oqý ornynyń basshysy Tilektes Esbolov Memleket basshysynyń «agrarlyq saıasat eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtýǵa baǵyttalýy kerek» degen sózin tolyq quptaıtynyn jetkizdi.

«Joldaýda aýylsharýashylyǵyn damytý máselesine basa mán berilgen. Bizge eksportqa  beıimdelgen, básekege qabiletti aýylsharýashylyǵy ónimi kólemin 2,5 esege arttyrý mindeti tur. Aýalsharýashylyǵy sektorynda shıkizat sektorynyń kólemi 100 paıyz dep alsaq, eksportqa shyǵatyn ónim kólemi  17-20 paıyz ǵana bolyp otyr. Al, 100 paıyz shıkizatty qaıta óńdeıtin óndiris qýattylyǵy  23-30 paıyz ǵana iske qosylyp tur», - dedi Tilektes Esbolov.

Sonymen qatar oqý ornynyń basshysy Joldaýda aıtylǵan resýrstardy únemdeý tehnologııasy, aqyldy tehnologııalar máselesi boıynsha aýylsharýashylyǵy salasynda bas ýnıversıtet  retinde qandaı jumys jasalyp jatqanyn aıtty.

«Agrotehnologııalyq hab ashtyq. Osy eki jarym jylda sheteldegi ǵylymı ortalyqtardan jańa tehnologııa, ınnovatsııa tartyldy. Jańa óndiris oryndarynyń jańa daıyn ónim shyǵaratyn qýattylyǵyn arttyrý maqsatynda AQSh departamentterimen  naqty kelisimshartqa qol qoıylyp otyr», - dedi oqý ornynyń basshysy.

Onyń aıtýynsha, joldaýda aýylsharýashylyǵy ǵylymyna erekshe kóńil bólingen.

«Aýylsharýashylyǵy salasyndaǵy ýnıversıtet rólin arttyrýǵa basymdyq berilip otyr. Bul degenińiz ǵylymǵa kóp kóńil bólýdi bildiredi. Búginde jalpy respýblıkada ǵylym salasynyń damýyna 66 mlrd teńge bólinedi, al aýylsharýashylyǵyna 6,9 mlrd teńge qarastyrylǵan. Bul Jalpy Іshki ónimniń  0,1 paıyzyn bildiredi. Bul menińshe jetkiliksiz.

Osy salada eleýli jumys atqarýymyz kerek.

Ǵylymdanǵan óndiristerge qajet maman daıyndaý kerek. Erte túlekterimiz suranysta bolýy úshin.

Soǵan baılanysty oqý praktıkasyn 6 aıǵa soyp otyrmyz. Respýblıkada 10 myń sharýa qojalyǵymen  tikeleı shart jasalǵan. 500 jańa pılottyq óndiriste ınnovatsııalyq jańa tehnologııa engizilip jatyr», - dedi rektor.

Aıta ketý kerek, búgin QR Memleket basshysy Nursultan Nazarbaevtyń Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri atty kezekti Joldaýy jarııalaǵan bolatyn.