Elbasy Joldaýy áleýetti kóterýge baǵyttalǵan serpindi qadam - Gaýhar Aldambergenova
Mundaı pikirdi Qazaq memlekettik qyzdar pedagogıkalyq ýnıversıtetiniń rektory, pedagogıka ǵylymdarynyń doktory, professor Gaýhar Aldambergenova bildirgen bolatyn. QazAqparat oqyrmandarynyń nazaryna Gaýhar Tóremuratqyzynyń Joldaýǵa qatysy pikir-paıymyn usynady.
Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýy jetistikke jetý jolyn tabý úshin nendeı jumystar istelýi qajettigin aıqyndaý jolyndaǵy mańyzdy ári aıtýly qadam. Elbasy jarııalaǵan basymdyqtar men mindetter Qazaqstandy áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. Elimiz egemendik jyldarynda únemi jahandyq jańa úrdisterdi qoldap keledi. Maqsat - aıqyn. Halyqtyń ál-aýqaty men turmystyq áleýetin arttyrý. Bıylǵy Joldaýdy ásirese, elimizdegi ustazdar qaýymy zor qýanyshpen qarsy aldy.
Elbasy mańyzdy qujattyń «Turmys sapasyn arttyrý» atty ekinshi basymdyǵynda joǵary bilim berýge qatysty, pedagog mártebesi jaıynda birqatar mańyzdy mindetterdi atap ótti. Atap aıtqanda, 2019 jyly «Pedagogtardyń mártebesi» týraly Zań qabyldanady. Bul - qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa zor qadam bolmaq.
Bul týraly Memleket basshysy: «Kelesi jyly «Pedagogtardyń mártebesi» týraly Zań qabyldaý kerek dep esepteımin. Ol zań muǵalimderdi jáne mektepke deıingi mekemelerdiń qyzmetkerlerin yntalandyratyn barlyq tetikterdi qarastyrýy kerek. Júktemeni qysqartyp, qyzmetten tys tekseristerden aryltý kerek. Tyńdańyzdar, muǵalimderge búgingi tańda barlyq jumys júktele beredi. Saılaýdy ótkizetin - muǵalimder, úgit-nasıhatty júrgizetin - muǵalimder, bir sharýany atqarý kerek bolsa - muǵalimder... Ol úshin eshkim de olarǵa aqsha tólep jatqan joq. Olardy bul júktemeden aryltý kerek. Olar sabaqqa daıyndalyp, tıisti ýaqytynda jumys isteýi kerek. Tynymsyz tekserister de bitpeıdi. Mine, zań osylardy toqtatý úshin kerek», - dedi.
Sondaı-aq, Memleket basshysy naryqta tek joǵary bilim bere alatyn joǵary oqý oryndary qalý kerektigin basa aıtty. Rasynda da bilikti, bilimdi kadrlar daıyndaýda jáne ǵylymı jumystar júıesinde ýnıversıtetter úlken mańyzdy ról atqarady. Osyǵan oraı otandyq joǵary oqý oryndary oqytýshylardyń qaıta daıarlyqtan ótýine basty nazar aýdaryp, álemdik jetekshi ýnıversıtetterdiń synnan ótken tájirıbesin paıdalanýy tıis dep oılaımyn. Bul - qazaqstandyq joǵary bilim berý júıesin zaman aǵymyna sáıkestendirýge negiz bolady.
Bilim berý salasynyń qyzmetkeri retinde bizdi Joldaýda maman daıarlaý sapasyn arttyra túsýge aıryqsha kóńil bólingeni de qanattandyrdy. Iá, qazir az da bolsa sapaly ári saýatty maman daıarlaıtyn ýaqyt keldi. Bul baıaǵy bir kezderdegideı oqý oryndarynyń topyrlatyp túlek shyǵaratyn úrdisiniń kúni ótip bara jatqanyn baıqatady. Munyń bári jańasha oılaýǵa jatady. Al jańasha oılaý - qoǵam sanasynyń jańǵyrýyna basty tetik.
Joldaýdyń bilimge qatysty qurmet kórsetýdi úndeıtin tarmaǵynan týǵan oılar bizdi osyndaı tujyrymdarǵa jeteleıdi. Túptep kelgende, sapaly bilim - bizdiń joǵary oqý oryndary men mamandardyń básekege qabilettigin arttyryp, olardyń osy saladaǵy is-áreketterine demeý bolady.
Bul turǵyda Qazaq memlekettik qyzdar pedagogıkalyq ýnıversıteti bilim men ǵylymdy damytýdy, qyzdarǵa pedagogıkalyq bilim berýdi jáne belsendi azamattyq ustanymdy basty maqsat etip kele jatqan oqý orny ekendigin aıtqym keledi. Ýnıversıtet ujymy Joldaýda kórsetilgen mindetterdi saralap, tyń oılary men ıdeıalaryn júzege asyrýǵa nıetti. Bul tarapta arnaıy keshendi jospar qabyldanady. Ol Prezıdent tapsyrmalarynyń oryndalýyn, oqý ornynda jaıly orta qalyptastyrýyn jáne oqytýshylardyń kásibı deńgeıin anyqtaýdy qamtamasyz etetin bolady.
Memleket basshysy usynǵan Joldaý Qazaqstan damýynyń jańa baǵytyn kózdeıdi. Mańyzdy qujattaǵy basymdyqtar men mindetter Qazaqstannyń áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. Jáne ol el damýy men turaqtylyǵyn qamtamasyz etetin uzaq merzimdi damý strategııasyna sáıkes keledi. Sonymen qatar, Joldaý Qazaqstannyń álemdegi tehnologııalyq, ekonomıkalyq jáne áleýmettik salalardaǵy tereń jáne qarqyndy ózgeristerge beıimdelýine sep bolady.
