Elbasy tapsyrmasymen Oralda úsh birdeı stýdenttik jataqhana salynady
«Qazaqstan memlekettik-jekeshelik áriptestik ortalyǵy» AQ basqarma tóraǵasynyń orynbasary Talǵat Mataev qatysqan jıynda stýdenttik jataqhanalardy memlekettik-jekeshelik áriptestik arqyly salýmen qatar bitpegen nemese daıyn ǵımarattardy paıdalana otyryp, qaıta beıimdeý máseleleri talqylandy.
Prezıdenttiń bes áleýmettik tapsyrmasy aıasynda 2022 jylǵa deıin elimizde 75 myń stýdentti qamtý mindeti qoıylǵany málim. Bul ońaı emes, sondyqtan máseleni tıimdi sheshý úshin barlyq múddeli uıymdardyń basyn biriktirý qajet.
Batys Qazaqstan oblysynda ýnıversıtetter men kolledjderde oqıtyn 1800 stýdent jataqhanany qajetsinedi.
«Bul - qaladaǵy ózekti máselelerdiń biri. Kóptegen stýdentterdiń páter jaldap, turyp jatqany belgili. Sondyqtan kásipkerlermen túsinik jumystaryn júrgizip, muny memlekettik-jekeshelik áriptestik ádisimen sheshý joldaryn izdestirýdemiz», dedi Oral qalasynyń ákimi Murat Muqaev.
«Qazaqstan memlekettik-jekeshelik áriptestik ortalyǵy» AQ basqarma tóraǵasynyń orynbasary Talǵat Mataevtyń aıtýynsha, jańa jataqhanalar salý qymbatqa túsedi ári ýaqyt ketedi. Sol sebepti bankterde kepilde nemese bos turǵan ǵımarattardy paıdalanǵan ári tez, ári arzan bolar edi. Tek mundaı nysandardy bitirý nemese qaıta qurý qajet.
«Qazaqstan memlekettik-jekeshelik áriptestik ortalyǵy» AQ qyzmetkerleri Oraldyń ózinde stýdenttik jataqhanaǵa keletin «Zolotoı vek», «Golden Palace» meıramhanalary jáne basqa ákimshilik ǵımarattar bar ekendigin jetkizdi. Bul maqsatqa 2019 jylǵa respýblıkalyq bıýdjetten 1,47 mlrd teńge bólingen.
Oblystyq bilim basqarmasy basshysynyń orynbasary Sandýǵash Aıtqalıevanyń sózine qaraǵanda, óńirde úsh jataqhananyń jobalyq-smetalyq qujattamasy jasalýda. 150 jáne 500 oryndyq eki jataqhana Oralda, 150 oryndyq taǵy bireýi Aqsaı qalasynda boı kótermekshi. Oblys ortalyǵynda 500 oryndyq taǵy bir jataqhana salý oılastyrylýda. Oblysta tórt kolledj ben bir ýnıversıtette jataqhanaǵa muqtajdyq bar.
«Qazaqstan memlekettik-jekeshelik áriptestik ortalyǵy» AQ bas keńesshisi Aıgúl Sadyqova stýdenttik úıdiń qajetti ınfraqurylymy, jan-jaqty jaǵdaıy bolýy kerektigin jetkizdi. Munda stýdent jastardyń sapaly bilim alyp, oqýǵa ázirlenýi úshin bári bolýy qajet. Bıylǵy 2 qazannan bastap memlekettik-jekeshelik áriptestik aıasynda jobalardy júzege asyrý baǵytynda memlekettik tapsyrystardy ornalastyrý erejesi resmı kúshine endi. Bul máseleni stýdenttik jataqhanalar salý, ekinshiden, ǵımarattardy qaıta qurý, úshinshiden, burynnan bar jataqhanalardy jańǵyrtý jolymen sheshýge bolady. Buǵan kásipkerler men ekinshi deńgeıli bankterdiń belsendi aralasqany asa mańyzdy.
