Elbasy «Qazaqstan» telearnasyna suhbat berdi

NUR-SULTAN. QazAqparat - QR Tuńǵysh Prezıdenti – Elbasy Nursultan Nazarbaevtyń «Qazaqstan» respýblıkalyq teleradıokorporatsııasynyń Basqarma tóraıymy Lázzat Tanysbaıǵa bergen suhbaty negizinde «Túrkistan: kóne men keleshek kópiri» derekti fılmi daıyndaldy, dep habarlaıdy QazAqparat tilshisi.

Fılmde Elbasy oblys mártebesine ıe bolǵan Túrkistan qalasynyń qaıta jańǵyrýy, tarıhı sheshimniń máni men mańyzy, kóne shahardyń týrıstik áleýeti men halyqaralyq arenadaǵy bedeli, qalanyń keleshek josparlary týraly jan-jaqty baıandaıdy.

Sonymen qatar Nursultan Nazarbaev telearnaǵa bergen suhbatynda Túrkistannyń Ortalyq Azııadaǵy jáne túrki álemindegi orny, «Túrki áleminiń kıeli jerleri» jobasy, «Kerýen-saraı» kópfýnktsıonaldyq týrıstik kesheniniń áleýeti, qala aýmaǵyn kógaldandyrý jáne Túrkistan qalasyn túrki áleminiń mádenı-rýhanı ortalyǵy retinde damytý jobalarynyń nátıjesi men olardyń azamattardyń ál-aýqatyn jaqsartýdaǵy yqpaly týraly týraly aıtady.

Derekti týyndy «Qazaqstan» arnasynan 1 jeltoqsan saǵat 20:00-de efırge shyǵady.

Eske salaıyq, 1 jeltoqsan kúni sondaı-aq saǵat 21:40-ta «Habar» telearnasynda jýrnalıst Aıgúl Ádilovanyń «Portrettiń shtrıhtary» derekti fılminiń birinshi serııasynyń premerasy ótedi.