Elbasy kóz janarynan aıyrylǵan belgili mýzykantqa tilegin bildirdi

ASTANA. QazAqparat - Qazaqstan Prezıdenti Nursultan Nazarbaev kózi kórmese de, ónerimen kópti tánti etip júrgen Saıda Halyqovaǵa izgi tilegin bildirdi, dep habarlaıdy «QazAqparat» HAA tilshisi.

Saıda Halyqova pıanınoda erkin oınaıtyn bilikti mýzykant. Italııada «Bolashaq» baǵdarlamasy boıynsha 3 jyl bilim alǵan talantty qyz elge oılanbaı oralǵan eken. Bala kúninde kózine jasalǵan operatsııa Saıdany qos janarynan aıyrǵan. Sol kezden bastap jigeri jasymaǵan ol, mýzyka álemine qyzyǵyp, klassıkalyq baǵyttaǵy shyǵarmalardy tyńdaǵan.

Talmaı izdenisiniń arqasynda Saıda 4-synypta oqyp júrgende-aq alǵashqy kontsertin bergen eken. Qazir mýzykant jylyna 2 ret shyǵarmashylyq keshin uıymdastyrady. «Qazaqstannyń 100 jańa esimine» engen mýzykantqa Qazaqstan Prezıdenti izgi tilegin bildirdi.

«Rahmet, Saıda! Osy jolmen júre ber. Sen qansha jasqa ónege bolasyń. Adamnyń múmkindiginiń sheksiz ekenin kórsetesiń. «Baqyttymyn» dediń, baqytty bol! Uzaq ǵumyr tileımin! Áli talaı shyǵarmalar jazasyń. Qýantasyń bizdi...», - dep tilek bildirdi Memleket basshysy.

Eske sala ketsek, búgin QR Prezıdenti Nursultan Nazarbaev «Rýhanı jańǵyrý» baǵdarlamasy aıasynda uıymdastyrylǵan «100 jańa esim» jobasynyń 102 jeńimpazymen kezdes ti. Qazaqstannyń týyn bıikke kótergen sportshylar men aq halatty dárigerler, metsenattyqpen kózge túsken beldi kásipkerler men ǵalymdar, mádenıet pen qoǵamdyq salada el aýzynda júrgen azamattar Elbasynyń jyly lebizine bólendi.