Elbasy kóshe sypyrýshy týraly xıkaıany aıtyp berdi
«Meniń esime bir xıkaıa túsip otyr. Bir kóshe sypyrýshysy bolǵan. Ol iri bank ǵımaraty mańyn jınaýmen aınalysqan. Bir kúni bank basshylyǵy óz qyzmetkerlerin bilimine qaraı tekserip shyǵýdy uıǵardy. Ony da shaqyryp, qol qoıýdy suraıdy. Jańaǵy kóshe sypyrýshysy qol qoıa almaımyn, saýsaqtyń izin ǵana qaldyra alamyn deıdi. Sonda mektepte oqyǵan joqsyń ba? Joq deıdi. Joǵary bilimiń de joq pa? Joq. Sonda bank basshylyǵy onyń sypaıy, izetti ári óz jumysyn úlken jaýapkershilikpen atqarǵanyna qaramastan jumystan shyǵaryp jiberdi. Bizge bilimi bar adam kerek dep, shyǵaryp saldy», - dedi N.Nazarbaev.
Prezıdenttiń aıtýynsha, jańaǵy kóshe sypyrýshysy biraz ýaqyt jumys izdep júrdi. Sosyn ózi sııaqty adamdardy taýyp aldy da, kóshe jınaıtyn kompanııany qurdy.
«Atalǵan kompanııa qalada eń úzdik kásiporyndardyń qataryna endi. Al kóshe sypyrýshysy eń baı adamǵa aınaldy. Bir kúni ony buryn jumys istegen bankke qaıtadan shyqyrypty. Sizdiń esepshotyńyzda osynshama aqsha bar, qol qoıýyńyz qajet dedi. Sol kezde ol men qol qoıa almaımyn, tek saýsaǵymnyń izin ǵana qaldyryp ketemin depti. Sonda mektepte oqyǵan joqsyń ba? Joq deıdi. Joǵary bilimiń de joq pa? Joq. Baı adamǵa qalaı aınaldyńyz? Meni jumystan shyǵaryp jibergen bir bankırdiń arqasynda osyndaı deńgeıge jettim degen eken. Sondyqtan men únemi osy bir mańyzdy máseleni aıtyp otyramyn. Keıbir adamdar Oksford, Kembrıdjdi bitirip keledi. Biraq eshqandaı jetistikke jete almaıdy. Barlyǵy adamnyń ózine baılanysty. Maqsatqa jetýge tyrysý qajet. Armany bolýy kerek. Armanyn oryndaǵan adam ǵana óziniń oılaǵan oıyna jetedi», - dep atap kórsetti Memleket basshysy.
Aıta keteıik, Astanadaǵy «Qazmedıa» ortalyǵynda Elbasy Nursultan Nazarbaevtyń «Qazaqstannyń 100 jańa esimi» jobasynyń ekinshi kezeńi jeńimpazdarymen kezdesýi ótip jatyr. Olardyń ishinde 29 jastaǵy Erjan Sálimgereev te bar. Ol úshinshi synypta oqyp júrgende transformatordyń ishine kirip, toqqa túsip qaldy. Sol kezde ol bir qol jáne bir aıaǵynan aıyryldy. Biraq qıynshylyqqa moıymaı, xalyqaralyq dárejedegi sport sheberi, Álem kýbogynyń tórt dúrkin ıegeri, Azııa oıyndarynyń eki márte jeńimpazy dárejesine deıin jetti.
