Elbasy qory qazaq tilin úıretetin jańa jobalarmen tanystyrdy
OQK-da ótken búgingi baspasóz máslıhatynda Soyle.kz onlaın-kýrsynyń aǵylshynsha jáne latyn grafıkasyndaǵy nusqasy, Android pen iOs platformalaryndaǵy Balasoyle mobıldi qosymshasy, «Uly dala ańyzdary» («Legendy velıkoı stepı») veb-grafıkalyq romandar serııasy, qazaq tilin úırenýge arnalǵan Soyletube vıdeojobasy tanystyryldy. Jobalardyń ishindegi erekshe nazar aýdartatyny - bul Soyle.kz onlaın-kýrsynyń aǵylshynsha jáne latyn grafıkasyndaǵy nusqasy. Osy ýaqytqa deıin qazaq tilin úırený múmkindigin tek orys tildi qoldanýshylar paıdalansa, qazir onlaın-kýrs shet elderde turatyn qazaqtar men aǵylshyn tildi sheteldikterge qoljetimdi bolyp otyr. Oǵan qosa portal arqyly jastar latyn grafıkasyn meńgere alady.
«Búgingi kúni Soyle.kz portalynda 115 myńnan astam adam til úırenýde. Ashylǵaly ony 5 mıllıonnan astam qazaqstandyq jáne sheteldik qoldanǵan. Al áleýmettik jeliler arqyly kúndelikti 30 myń adam qazaq tilin úırenedi. Búgingi kúni «Soyle» mobıldi qosymshasyn 50 myń adam júktegen. 2016 jyldan bastap Soyle.kz ádistemesi boıynsha Skype arqyly qazaq tilin oqytý sabaqtary tegin júrgizilýde. «Astana» radıosynda aptasyna 3 ret qazaq tilin meńgerýge arnalǵan baǵdarlamalar ótkiziledi», - deıdi QR Tuńǵysh Prezıdenti - Elbasy qorynyń baspasóz-hatshysy Oksana Loskýtova.
Oksana Loskýtovanyń aıtýynsha, Balasoyle mobıldi qosymshasy damytatyn onlaın oıyndar arqyly mektepke deıingi jáne mektep jasyndaǵy balalarǵa qazaq tilin úıretýde. Joba balalardyń durys sóıleýine, grammatıka erejelerin meńgerýge, sózdik qoryn damytýǵa jáne qorshaǵan ortany tanýǵa yqpal etedi. Kúndelikti portaldy 1,5 myń adam paıdalanady.
Aıta keterligi, barlyq jobalar QR Tuńǵysh Prezıdenti - Elbasy qory jáne «Samruk-Kazyna Trust» áleýmettik jobalardy damytý qorynyń qoldaýymen ázirlengen. Qor «Uly dala ańyzdary» onlaın jobasy aıasynda veb-grafıkalyq romandar serııasyn ázirleýdi qolǵa alyp, qazaq, orys jáne aǵylshyn tilderindegi «Qazcomics.kz» veb-saıty men mobıldi qosymshasy ázirlegen. «Uly dala ańyzdary» jobasy «Uly mahabbat týraly jeti hıkaıa» jáne «Qazaq jeriniń uly batyrlary» atty bólimderden, sonymen qatar qazaq halqynyń ǵasyrdan ǵasyrǵa, urpaqtan urpaqqa jetken tarıhy men ańyzdarynan turady. Barlyq ańyzdar kópshilikke Qazaqstannyń kıeli jerleri týraly tolyǵyraq málimet alýǵa múmkindik beredi.
«Samruk-Kazyna Trust» qory áleýmettik jáne til jobalaryn, atap aıtqanda, qazaq tilin úırenýge baǵyttalǵan Soyle.kz onlaın-kýrstaryna qoldaý kórsetýde. Onlaın-jobanyń kómegimen kóptegen ǵalamtor qoldanýshylary memlekettik tildi tegin úırenýge múmkindik aldy», - deıdi qordyń áleýmettik jobalardy damytý qorynyń korporatıvtik kommýnıkatsııalar departamentiniń dırektory Mıras Іrgebaev.
Sonymen qatar, Memlekettik tildi damytý qory tanymal Youtube beıne-platformasynda tildi meńgerýge arnalǵan paıdaly beınesabaqtar toptamasyn ázirlegen. Beınesabaqtar qazaq tilinde durys sóıleýdi jetildirýge baǵyttalǵan jáne kúndelikti turmysta jıi qoldanylatyn mysaldardan turatyn dıalog túrinde túsirilgen. Sabaqtar tildi jańadan úırenip bastaǵan jáne ony meńgerip alǵandarǵa kómektesetin resýrstar jınaqtalǵan. Qazirgi ýaqytta Youtube-arnasynda «Soyletube» arnasynyń 8 beınerolıgi júktelip otyr.
