Elbasy qory 850 myń adamǵa kómek kórsetti

NUR-SULTAN. QazAqparat - Elbasy qory 850 myń adamǵa kómek kórsetti. Bul týraly Nursultan Nazarbaev qorynyń dırektory, Qazaqstan jastary kongresi Qamqorshylyq keńesiniń tóraıymy Darıǵa Nazarbaeva aıtty, dep habarlaıdy QazAqparat tilshisi.

«Osy joly forým beınekonferentsııa formatynda ótýde. Eshbir tehnıkalyq progress jeke qaýyshyp, qol alysyp qarym-qatynas jasaýdyń baǵa jetpes múmkindigine jetpeıdi. Barlyǵymyz bir-birimizdi saǵynamyz jáne epıdemııany jeńip, ómirimz burynǵy qalpyna qaıta oralatynyna senimdimiz. Bıylǵy jyl elimiz úshin jáne árbireýimiz úshin úlken synaq jyly boldy. Pandemııanyń qara bulty adamdardyń densaýlyǵyna nuqsan keltirip, ómirlerin qıyp, álemge qaýip-qater tóndirdi», - dedi ol «Jańa jaǵdaıdaǵy jastar: Іs-qımyl kezeńi» atty onlaın forýmnyń ashylýynda.

Osy rette Darıǵa Nazarbaeva jaqyndarynan aıyrylǵan adamdarǵa kóńil aıtty.

«Bul óte qatal orny tolmas qaıǵy. Basqasynyń barlyǵyn ornyna qaıta keltirýge bolady. Men Qazaqstan jastar kongresiniń barlyq belsendilerine, eriktilerge barlyǵymyz úshin osyndaı qıyn kezeńde adamdarǵa adal nıetpen qol ushyn berip kómek kórsetkenderi úshin zor qurmetpen alǵys aıtam. Bizdiń eriktiler Elbasymyzdyń bastamasy - #BIZBIRGEMIZ jobasyn sátti iske asyrý úshin kóp jumys atqardy. Myńdaǵan mekenjaılarǵa azyq-túlik, dári-dármekter, sanıtarlyq qural-jabdyqtar jetkizildi. Birinshi kezekte erekshe qajettiligi bar adamdarǵa, muqtaj kópbalaly otbasylarǵa, áleýmettik mekemelerge jetkizildi. Osy kezeńde, kóktemde elimizdiń barlyq turǵyndarynyń birligin, barlyǵymyzdyń birge ekendigimizdi seziný óte mańyzdy boldy», - dedi Darıǵa Nursultanqyzy.

Onyń atap ótýinshe, bul iske jeke tulǵalar, qoǵamdyq uıymdar, jeke kompanııalar atsalysty.

«Elbasy Qory, onyń negizin qalaýshynyń tapsyrmasy boıynsha, 850 myń adamǵa kómek kórsetti. Qazaq eli jomart adamdarǵa baı. Biz olardyń márttigi men qaıyrymdylyǵy úshin zor rızashylyǵymyzdy bildiremiz. Bizdiń tamasha jastarymyz bar. Elgezek! Jomart! Jankeshti! Men senderdi maqtan tutam!», - dedi ol.

Aıta keteıik, Aqparat jáne qoǵamdyq damý mınıstrligi Qazaqstan Jastar kongresimen seriktestikte respýblıkanyń barlyq aımaqtaryn onlaın formatta baılanystyra otyryp, «Jańa jaǵdaıdaǵy jastar: Іs-qımyl kezeńi» respýblıkalyq jastar bilim berý jobasyn iske qosty. Atalmysh shara bıylǵy jyly onlaın formatynda ótip jatqan «Zeren» bilim berý lageri aıasynda uıymdastyryldy.