Elbasy kórshi memleketter kóshbasshylarymen kezdesti

ASTANA. QazAqparat - Aqordada Qazaqstan Prezıdenti N.Nazarbaev Túrikmenstan prezıdenti G.Berdimuxamedovpen kezdesti. N.Nazarbaev Qazaqstan men Túrikmenstan arasyndaǵy qarym-qatynastardyń qarqyndy damyp kele jatqanyna oń baǵa berip, yntymaqtasý keleshegi zor ekenine senimin bildirdi. «Túrikmenstandy, jalpy túrikmen halqyn biz ózimiz úshin eń jaqyn kórshi, áriptes jáne baýyrlas halyq dep sanaımyn. Táýelsizdiktiń 25 jylynda ózara qarym-qatynasymyz árdaıym joǵary deńgeıde boldy. Elderimizdiń arasynda eshqandaı sheshilmegen máseleler bolǵan joq. Biz qalaı qarym-qatynasymyzdy ornattyq, búgingi kúnge deıin ol sondaı deńgeıde qalyp otyr. Kórshi elmen syrtqy saıasatta yntymaqtastyq ornatyp, Túrikmenstan bastamalaryn halyqaralyq deńgeıde qoldaımyz. Kórshi el de bizdiń bastamalardy qoldap júredi» dedi N.Nazarbaev.

Búginde Qazaqstan men Túrikmenstan túrli óńirlik jáne xalyqaralyq uıymdar arasynda tabysty is-qımyl jasap keledi. Bul turǵyda Elbasy N.Nazarbaev: «Bizdiń otyn, energetıka, kólik pen tranzıt salalarynda ekonomıkalyq yntymaqtastyǵymyz qarqyndy damýda» dep atap kórsetti. Sonyń biri Qytaı bastamashy bolǵan «Jibek jolynyń ekonomıkalyq beldeýi» halyqaralyq jobasy. Bul joba eki baǵyttan turady: birinshisi - qurlyqtaǵy Jibek jolyn jańǵyrtý bolsa, ekinshisi - HHІ ǵasyrdaǵy teńizdegi Jibek joly. Bul ekeýiniń birikkendegi ortaq ataýy - «Bir beldeý - bir jol» jobasy. Qazaqstan Prezıdenti Túrikmenstanmen birlesken iri jobalardyń biri - Qazaqstan-Túrikmenstan-Iran temirjoly jańa Jibek jolynyń kúre tamyry ekenin atap ótti. Elbasy bul ınfraqurylymdyq jobanyń mańyzy týraly 15 mamyr kúni Beıjińde ótetin «Bir beldeý - bir jol» forýmynda egjeı-tegjeıli aıtylatynyn jetkizdi.

Kezdesý barysynda eki el prezıdentteri Qazaqstan men Túrikmenstan arasyndaǵy strategııalyq áriptestik týraly kelisimdi jáne qazaq-túrikmen memlekettik shekarasyn shegendeý týraly shartty rásimdedi. Sonymen qatar ǵylymı-texnıkalyq, ekonomıkalyq jáne mádenı-gýmanıtarlyq máseleler boıynsha úkimetaralyq komıssııa týraly kelisimge, úkimetter arasyndaǵy qupııa aqparattardy ózara qorǵaý týraly shartqa, Syrtqy ister mınıstrlikteriniń yntymaqtas­tyq baǵdarlamasyna, Qarjy mınıstrlikteri arasyndaǵy qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl salasyndaǵy ózara árekettestik týraly kelisimge, Astana men Ashxabad arasynda baýyrlastyq ­týraly kelisimge, Qazaqstan men Túrikmenstannyń kásipkerlik palatalary arasyndaǵy yntymaqtastyq týraly shartqa qol qoıyldy.

Elbasy N.Nazarbaev Qyrǵyzstannyń Bishkek qalasynda ótken Joǵary Eýrazııalyq ekonomıkalyq keńestiń otyrysyna jáne Ujymdyq qaýipsizdik týraly shart uıymyna múshe memleketter basshylarynyń beıresmı kezdesýine qatysty. Aýqymdy is-sharaǵa EAEO múshe bes eldiń de prezıdentteri - Qazaqstan Prezıdenti N.Nazarbaev, Reseı Federatsııasynyń Prezıdenti V.Pýtın, Belarýs Prezıdenti A.Lýkashenko, Armenııa Respýblıkasynyń Prezıdenti S.Sargsıan, Qyrǵyz Respýblıkasynyń Prezıdenti A.Atambaev jáne EEK alqasynyń tóraǵasy Tıgran Sarkısıan qatysty. Sonymen qatar jıynǵa Moldova prezıdenti Igor Dodon EAEO baqylaýshy bolýǵa úmitker el retinde qatysty. Alqaly jıyndy keńestiń bıylǵy tóraǵasy retinde Qyrǵyzstan Prezıdenti A.Atambaev júrgizdi.

Qazaqstan Prezıdenti N.Nazarbaev EAEO aıasynda kóp jumystar atqarylǵanyn aıtty. Elbasynyń málimdeýinshe, qazir uıymnyń sharttyq quqyqtyq bazasy qurylyp, turaqty keńeıý ústinde. Uzaqmerzimdi jáne ortamerzimdi basymdyqtar aıqyn. EAEO taýarlar, qyzmetter, kapıtal, jumys kúshi erkin qozǵala bastady. Túrli eldermen, halyqaralyq uıymdarmen baılanys rettele túsýde.