Elbasy kitaphanasynda «Koreıa tústeri: keshe jáne búgin» kórmesi ashyldy
«Elbasy kitaphanasy qazaqstandyqtarǵa sheteldiń dástúri men mádenıetin tanystyrýdy jalǵastyryp, búgin «Koreıa tústeri: keshe jáne búgin» kórmesin nazarlaryńyzǵa usynyp otyr. Birneshe jyldar boıy Koreı mádenı ortalyǵymen birlesken jobalar sátti júzege asyryldy. Kezekti kórmeniń shymyldyǵyn túre otyryp, eki el arasyndaǵy dostyq baılanysyn bekite túsetindigimiz anyq. Dál osyndaı sharalardyń sheńberinde elorda turǵyndary men qonaqtaryna Koreıa Respýblıkasynyń tarıhı murasy men baǵaly ónerimen jaqyn tanysýǵa múmkindik týady. «Koreıa tústeri: keshe jáne búgin» kórmesi bizdi dástúrli koreı turmysymen tanystyrady. Búgingi usynylǵan kostıýmderden, keramıka men aǵashtan jasalǵan úı kerek-jaraqtarynan koreı halqynyń kózdiń qarashyǵyndaı saqtap, urpaqtan-urpaqqa jalǵap kele jatqan ulttyq ádet-ǵuryptarynyń boıaýyn kóre alamyz», - dedi kórmeni ashqan Elbasy kitaphanasynyń dırektory Baqytjan Temirbolat .
Іs-shara «Mádenıet arqyly únqatysý» halyqaralyq kórme jobasy aıasynda Elbasy kitaphanasy Qazaqstan Respýblıkasyndaǵy Koreıa Respýblıkasy Elshiliginiń Koreı mádenı ortalyǵymen birlese otyryp, Sýkmen Qyzdar Ýnıversıteti Mýzeıiniń qoldaýymen, sondaı-aq Koreıa Respýblıkasynyń Mádenıet, sport jáne týrızm mınıstrligi men Koreıanyń Halyqaralyq mádenı almasý qorynyń «Saıahat jasaǵan koreı óneri 2021» jobasy negizinde uıymdastyryldy.
«Búgingi kórmege arnaıy ýaqyttaryn bólip kelgen barlyq qonaqtarǵa alǵysym sheksiz. Sonymen qatar, Elbasy kitaphanasyna erekshe alǵysymdy bildirgim keledi. «Koreıa tústeri: keshe jáne búgin» kórmesi biz úshin erekshe mánge ıe bolyp, júrekke sál jubanysh syılaıdy dep úmittenemin. Pandemııadan qajyǵan jandar úshin Koreıanyń erekshe tústerin beıneleıtin túrli kıimdermen, dástúrli áshekeılermen jáne qolónermen tanysýǵa tamasha múmkindik bolady. Qazaqstan Táýelsizdiginiń 30 jyldyǵyn merekeleý jyly Qazaqstan men Koreıa azamattary bir-birin jaqsyraq bilýi úshin eki el arasyndaǵy mádenı baılanysty keńeıtýdiń orny erekshe dep úmittenemin. Aldaǵy ýaqytta Koreıa Respýblıkasynyń elshiligi men mádenı ortalyǵy qyzyqty, tanymdyq is-sharalar ótkizýdi josparlap otyr», – dedi Koreıa Respýblıkasynyń Qazaqstandaǵy Tótenshe jáne ókiletti elshisi Ký Hong-sok .
Іs-sharaǵa sheteldik elshiler, QR Parlamenti Májilisiniń depýtattary, oqý oryndary men mádenı mekemeleriniń, ǵylymı-zertteý jáne ulttyq mádenı ortalyqtardyń basshylary qatysty.
«Koreıa tústeri: keshe jáne búgin» kórmesiniń ekspozıtsııasynda koreılerdiń dástúrli kıim úlgileriniń artefakteri men reprodýktsııalary sanalatyn jádigerler, koreıalyq dástúrli turmystyq zattaryn usynǵan Koreıa avtorlarynyń, Sýkmen áıelder ýnıversıteti túlekteriniń zamanaýı jumystary usynylǵan. Kórme jádigerleri «bes tús – bes negizgi baǵyt» tujyrymdamasy negizinde daıyndaldy.
Kórmemen tanysý úshin áleýmettik qashyqtyqty saqtaýǵa jáne ekspozıtsııada erkin júrýge múmkindik beretin aýdıogıdterdi qoldanýǵa bolady. Aýdıogıdter kómegimen kórme týraly aqparatty memlekettik, orys, aǵylshyn jáne koreı tilderinde tyńdaýǵa bolady.
Kórme bastalǵanǵa deıin koreılerdiń «hvarot» dástúrli toı kóılegin qaǵazdan jasaý boıynsha sheberlik-synyp ótti, oǵan Nur-Sultan qalasyndaǵy Balalar kórkemsýret mektebi – ıÝNESKO klýbynyń tárbıelenýshileri qatysty.
«Koreıa tústeri: keshe jáne búgin» kórmesi 2021 jyldyń 16 mamyryna deıin jalǵasady
