Elbasy kitaphanasy men TúrkPA memorandýmǵa qol qoıdy
Sapar barysynda Elbasy kitaphanasy men TúrkPA yntymaqtastyq memorandýmyna qol qoıdy.
«Baýyrlas túrik halqy – egemendigimizdi alǵash bolyp moıyndaǵan el. Atalmysh qujatqa qol qoıý arqyly qos mekeme eki memleket arasyndaǵy yntymaqtastyqty damytýdyń kezekti qadamyn jasap otyr. Bul rásimniń táýelsizdiktiń 30 jyldyǵy men elimizdiń TúrkPA-ǵa tóraǵalyq etý jylynyń tusynda aıryqsha mańyzy zor. Túrki áleminiń aqsaqaly retinde Elbasy túrkitildes elderdiń ıntegratsııasynyń serpinine, mádenı jáne rýhanı qundylyqtarymyzdyń damýyna eleýli úles qosty. Birlesken kúsh-jigerimiz bilim berý, mádenı jáne ǵylymı baǵyttar salasyndaǵy ózara is-qımyldyń sapaly deńgeıin qamtamasyz etýge yqpal etetinine senimdimiz», - dedi Baqytjan Temirbolat.
Memorandým TúrkPA-ǵa múshe memleketterdiń ózara árekettestigin nyǵaıtyp, túrki halyqtarynyń mádenı jáne tarıhı murasyn, tilderin, dástúrlerin, rýhanı qundylyqtaryn saqtaý men damytý maqsatynda birlesken mádenı, bilim berý jáne zertteý jobalaryn iske asyrý arqyly túrki halyqtarynyń yntymaqtastyǵyn arttyrýdy kózdeıdi.
Memleket basshysy Qasym-Jomart Toqaev atap ótkendeı, Elbasy Nursultan Nazarbaevtyń bastamasymen qurylǵan TúrkPA – baýyrlas elderdiń birligin bekemdeıtin bedeldi uıym.
«Jańa syn-qaterlerge tótep beremiz desek, ózara yntymaqtastyqty barynsha nyǵaıta túsýimiz qajet. Áriptesterimizdiń áleýetin arttyryp, túrki áleminiń halyqaralyq arenadaǵy rólin kúsheıtýge tıispiz», - degen edi Q. Toqaev.
«Qazaqstannyń Tuńǵysh Prezıdenti Nursultan Nazarbaev saıası arenada kóregen saıasatker, parasatty tulǵa retinde úlken qurmetke ıe. Osy oraıda TúrkPA Elbasynyń esimimen atalǵan kitaphanamen, ıaǵnı bilim men ǵylymdy, tarıh pen mádenıetti shoǵyrlatqan ortalyqpen seriktes bolýǵa qýanyshtymyz. Yntymaqtaǵymyz nyǵaıa bersin! Elderińiz aman, jurttaryńyz tynysh bolsyn!», - dedi Mehmet Sıýreııa Er.
Kezdesý aıasynda delegatsııa múshelerine Elbasy kitaphanasynyń mýzeıi boıynsha ekskýrsııa júrgizildi.
