Elbasy qamqorlyǵymen Araldyń ajary arta tústi – Qarlyǵash Aqysheva

QYZYLORDA. QazAqparat - Tuńǵysh Prezıdent kúnine oraı elimizdiń bilim berý mekemelerinde «Táýelsizdiktiń jeti qyry» atty fılmder toptamasy kórsetilip jatyr. Bul fılmderdi tamashalaǵan kórermender qatarynda Qyzylorda qalasyndaǵy E. Áýelbekov atyndaǵy daryndy balalarǵa arnalǵan №4 oblystyq mektep-ınternatynyń ujymy da bar. QazAqparat tilshisi bilim ordasynyń dırektory Qarlyǵash Aqyshevamen atalǵan týyndydan alǵan áseri jóninde oı bólisken edi.

«Aıta keterligi, atalǵan derekti fılm elimizdiń ótkenin saraptap, bolashaqqa bet alǵan jolymyzdy kórsetken baǵdar boldy. Tarıhı sanany jańǵyrtýǵa, jastardy patrıottyq sezimge baýlýǵa zor septigin tıgizdi. Alǵa umtylys jasaýǵa serpin berip, el erteńiniń jarqyn bolýyna týra jol siltedi. Ult tarıhyn sanaǵa sińirý elimizdiń barsha azamattarynyń boıynda patrıottyq sezim týǵyzyp, árbirimizge úlken jaýapkershilik júkteıdi. Ótkenimizdi bilmeı, bolashaǵymyzdy aıqyndaý múmkin emes. Elimizde búgingi kúnge deıin ekonomıkamyzdyń damýy, gúldenýi jolynda aýqymdy ister atqaryldy. Endigi jerde túp-tamyrymyzǵa qaıta kelip, shyn máninde rýhanı jańǵyrý baǵytynda oń ister qolǵa alyndy», - dedi Q. Aqysheva bizben áńgimesinde.

Onyń aıtýynsha, táýelsizdik jyldarynda Elbasynyń qoldaýymen Syr óńirinde de aıshyqty ister júzege asty. Solardyń biri - Aral teńiziniń soltústik bóligin saqtap qalý jobasy.

«Bul maqsatta Halyqaralyq Araldy qutqarý qory aýqymdy jumys júrgizdi. Ol ıgilikti isterge jol ashty. Aral tóńiregin ekologııalyq turǵydan saýyqtyrý baǵytynda jańashyl bastamalar qolǵa alyndy. Sol aýmaqtaǵy áleýmettik-ekonomıkalyq problemalaryn sheshý jónindegi kóptegen baǵdarlama dúnıege keldi. Elbasynyń qamqorlyǵy arqasynda Dúnıejúzilik banktiń qoldaýymen osylaısha teńizdiń soltústik bóligi qalpyna keltirilip, jergilikti jurtshylyq aıryqsha qýanyshqa bólendi. Qazir teńizdiń soltústik bóligi Aral qalasyna jaqyndaı tústi. Ol jergilikti halyqtyń turmys jaǵdaıyn jaqsartýǵa oń yqpalyn tıgizdi, Munda baıaǵy tirshilik aýany qaıta jalǵasty. Balyq aýlaýǵa, jumys oryndaryn qurýǵa múmkindik týdy. Teńiz tartylǵan soń nápaqasynan aıyrylyp, tuzdy shańnan qıyndyq kórgen kópshilik Aralǵa qaıta orala bastady. Jarasymdy ómir órnekteri kóz aldymyzda qaıta jańǵyra tústi. Derekti fılmdi tamashalaý barysynda osyndaı oń bastamalar keńinen kórinis tapqan», - dedi Q.Aqysheva.

Esterińizge sala ketelik, Tuńǵysh Prezıdent kúni qarsańynda elimizdiń bilim berý mekemelerinde «Táýelsizdiktiń jeti qyry» derekti fılmder toptamasy kórsetile bastady. Olardyń negizinde synyp saǵattary, ashyq sabaqtar, dóńgelek ústelder, pikirtalastar jáne kýratorlyq sabaqtar ótkiziledi. 2,8 mln-nan astam mektep oqýshysyn jáne joǵary oqý oryndary men kolledjderdiń 700 myńnan astam stýdentin qamtý josparlanyp otyr.

Basty foto: vmulder.livejournal.com