Elbasy: Halqymyzdyń qamy - meniń múddem bolyp qala beredi

ASTANA. QazAqparat - Qazaqstannyń Tuńǵysh Prezıdenti Nursultan Nazarbaev respýblıkalyq telearnalar arqyly Qazaqstan halqyna arnalǵan málimdemesinde óziniń jańa mindetin atady, dep habarlaıdy QazAqparat tilshisi.

«Halqymyzdyń qamy - meniń múddem bolyp qala beredi. Táýelsiz Qazaqstan memleketiniń negizin qalaýshy retindegi aldaǵy meniń mindetim - basshylardyń jańa býynynyń bılikke kelýin qamtamasyz etý. Olar elimizde jańǵyrtý protsesterin jalǵastyratyn bolady», - dedi Tuńǵysh Prezıdent.

Sonymen birge, Nursultan Nazarbaev ózine qoldaý bildirip kelgen halyqqa alǵys aıtty.

«Osy jyldarda ótken barlyq saılaýlarda Sizder maǵan senim artyp, bastamalaryma qoldaý bildirdińizder. Maǵan uly halqyma, týǵan jerime qyzmet etý baqyty buıyrdy. Barshańyzǵa - halqyma zor rızashylyǵymdy bildirip, basymdy ıemin. Osyndaı qoldaýdyń arqasynda Sizderdiń senimderińizdi aqtaý úshin men bar kúsh-jigerimdi, densaýlyǵymdy, ýaqytymdy aıamaı adal qyzmet ettim», - dedi Nursultan Nazarbaev.

Aıta keteıik, búgin Nursultan Nazarbaev QR Prezıdenti retindegi ókilettigin toqtatatynyn málimdedi.