Elbasy: EO men EAEO – bir-birin tolyqtyratyn ózara baılanysty uıymdar

NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev Eýropalyq odaq pen Eýrazııa ekonomıkalyq odaǵy áriptestiginiń dıalogtyq mehanızmin engizýdi usyndy, dep habarlaıdy QazAqparat tilshisi.

«Áli kúnge deıin Eýropalyq odaq pen Eýrazııalyq ekonomıkalyq odaq arasynda tolyqqandy dıalog ornamaǵan. Bul eki birlestik geografııalyq jáne tarıhı turǵyda baılanysty jáne bir-birin ózara tolyqtyrady. Qazirgi saıası túsinispeýshilikter bizdi ajyratpaýy tıis. Búginde EO men Reseı arasyndaǵy qarama-qaıshylyqtarǵa núkte qoıý qajettigi týraly kóp estımiz. Barlyǵy bul narazylyqtyń memleketter ekonomıkasyna qandaı shyǵyn ákelip jatqanyn túsinip keledi», - dedi Elbasy «Astana Club» plenarlyq otyrysynda.

Onyń aıtýynsha, bul qaıshylyqtar esh memleketke paıda ákelmeıdi.

«Sondyqtan, EO men EAEO arasyndaǵy áriptestiktiń dıalogtyq mehanızmin engizýdi usynamyn. Onyń aıasynda jyl saıyn Eýropalyq komıssııa men Eýrazııalyq ekonomıkalyq komıssııa basshylary arasynda sammıtter qarastyrylýy tıis. Men Joǵary Eýrazııa ekonomıkalyq keńesiniń qurmetti tóraǵasy retinde bul protseske jan-jaqty qoldaý kórsetýge daıynmyn. Ekonomıkalyq kooperatsııa protsestiń barlyq qatysýshylaryna paıda ákeledi dep senemin», - dedi N. Nazarbaev.