Elbasy Astanada «Hılton» qonaq úıiniń ashylý rásimine qatysty

 ASTANA. QAzAqparat - Memleket basshysy «Astana EKSPO-2017» kórme kesheniniń aýmaǵynda ornalasqan bes juldyzdy «Hılton» qonaq úıiniń saltanatty ashylý rásimine qatysty, dep habarlaıdy Aqordanyń baspasóz qyzmeti.

Rásim sońynda Nursultan Nazarbaev Reseı, Koreıa, Túrikmenstan, Ózbekstan, Frantsııa jáne Birikken Arab Ámirlikteri elderiniń ulttyq pavılondaryn aralap kórdi.

Qazaqstan Prezıdenti Reseı pavılonynda eldiń energetıkadaǵy jetistikterin jáne Arktıka jaǵdaıynda bolashaqtyń energetıkalyq ıdeıalaryn kórsetetin ekspozıtsııalarmen tanysty.

Ózbekstan pavılonynda Memleket basshysyna bul eldiń ǵylymı-óndiristik jetistikteri men tehnologııalyq jobalary, sonyń ishinde kólik jasaý salasynda qoldanylatyn «Elektrokart» eksperımenttik platformasy kórsetildi.

Sondaı-aq, Nursultan Nazarbaev Túrikmenstannyń ulttyq pavılonynda derbes gelıobıologııalyq qaldyqsyz keshenniń maketin kórdi.

Qazaqstan Prezıdentine Birikken Arab Ámirlikteriniń jańartylatyn energetıka salasyndaǵy jetistikteri jóninde baıandaldy.

Memleket basshysyna Koreıa pavılonynda «Aqyldy energetıkalyq mıkrojeli» qurylǵysy men energııa únemdeý júıesiniń jumysy tanystyryldy.

Sonymen qatar, Nursultan Nazarbaev Frantsııanyń jańartylatyn energııa kózderin jáne «aqyldy qalalar» men ekomobıldilikti damytý salalaryndaǵy jetistikterimen tanysty.