Elbasy Asqar Mamındi qabyldady

NUR-SULTAN. QazAqparat - «Nur Otan» partııasynyń Tóraǵasy Nursultan Nazarbaev partııanyń Saıası keńesi Bıýrosynyń múshesi, Premer-Mınıstr Asqar Mamındi qabyldady. Bul týraly QazAqparat elbasy saıtyna silteme jasap habarlaıdy.

Kezdesýde Elbasyǵa 2020 jyly áleýmettik-ekonomıkalyq jáne sanıtarlyq-epıdemıologııalyq ahýaldy turaqtandyrý boıynsha qabyldanǵan sharalardyń nátıjesi týraly baıandaldy.

Qazaqstannyń Tuńǵysh Prezıdenti 2020 jyly koronavırýs pandemııasyna baılanysty Úkimet jumysy kúrdeli jaǵdaıda ótkenin aıtty.

Elbasy ulttyq ekonomıkanyń turaqtylyǵyn saqtaý jáne strategııalyq damý baǵdarlamalaryn iske asyrý jónindegi Úkimettiń der kezinde qabyldaǵan sharalaryna toqtalyp, negizgi makroekonomıkalyq kórsetkishterdiń óskenin atap ótti.

Premer-Mınıstrdiń málimetine sáıkes, negizgi kapıtalǵa salynǵan ınvestıtsııalar 17 protsentke ulǵaıyp, jumyssyzdyq 5 protsentti qurady. Jeńil ónerkásipte 16 protsent, farmatsevtıkada 40 protsent, mashına jasaýda 16 protsent, qurylysta 12 protsent jáne basqa salalarda da ósim bar.

Sondaı-aq Qazaqstannyń Tuńǵysh Prezıdentine elimiz boıynsha 19 myńǵa jýyq jumys ornyn qurýǵa múmkindik bergen Indýstrııalandyrý kartasy aıasynda júzege asyrylyp jatqan jobalar týraly aqparat berildi.

A.Mamın óz sózinde memlekettik organdardyń, qoǵamdyq ınstıtýttardyń birlesken is-qımyly jáne «Nur Otan» partııasynyń belsendi jumysynyń arqasynda Qazaqstanda pandemııanyń jappaı órshýine jol berilmegenin atap ótti.