Elbasy Altaı Kólginovti qabyldady
Kezdesýde Nursultan Nazarbaev Elordanyń ákimine bas qalamyzdy odan ári damytý úshin zor jaýapkershilik júktelgenin atap ótti.
«Kez kelgen memlekettiń astanasy el jáne úkimet basshylyǵynyń jiti nazarynda bolady. Elorda ákimine zor jaýapkershilik júkteledi. Elimizdiń qonaqtary, eń aldymen, Qazaqstannyń astanasyna keledi. Bas qalanyń damý deńgeıine qarap, jalpy memlekettiń damý barysyn baǵalaýǵa bolady», - dedi Nursultan Nazarbaev.
Qazaqstannyń Tuńǵysh Prezıdenti Elordanyń jańa ákiminiń júktelgen mindetterdi júzege asyrý úshin iskerligi men tájirıbesi jetkilikti ekenin atap ótti.
«El basshylyǵy jáne Úkimet Sizdiń jumysyńyzǵa qoldaý kórsetedi. Kóp jumys atqarylýǵa tıis. Elorda turǵyndary tarapynan qala basshylyǵyna árdaıym joǵary talaptar qoıylady», - dedi Elbasy.
Altaı Kólginov bas qalamyzdyń áleýmettik-ekonomıkalyq damý kórsetkishterin jaqsartý úshin atqarylatyn jumys týraly aıtty.
«Qazirgi ýaqytta qalany damytý úshin qabyldanǵan baǵdarlamalar júzege asyrylýda. Ósim deńgeıin odan ári qamtamasyz etý maqsatymen berilgen barlyq tapsyrmalar oryndalyp jatyr. Ekonomıkalyq kórsetkishter jaqsy. Shaǵyn jáne orta bıznes, sondaı-aq óndiris kólemi artyp keledi», - dedi elorda ákimi.
