Elbasy: 2016 jyldyń sońyndaǵy syrtqy ekonomıkalyq saparlarym jaqsy nátıjelermen aıaqtalýda
Eki eldiń qarym-qatynasy Táýelsizdiktiń alǵashqy jyldarynan bastap jaqsy bolǵanyna toqtalǵan Memleket basshysy, «Sonyń arqasynda osy jyldarda Ońtústik Koreıadan Qazaqstanǵa 10 mlrd dollarǵa jýyq tikeleı ınvestıtsııa keldi. Qazirgi kezde elimizde 500 koreı-qazaq birlesken kompanııalary jumys isteýde. Keshegi kezdesýlerde baıqadyńyzdar, osy eldiń eń iri kompanııalarynyń basshylyǵymen kezdesýler ótti. Olar dúnıejúziniń kóptegen elderinde jumys isteıtin transulttyq kompanııalar jáne bizge olar óte qajet. 17 kompanııanyń basshysy sóz sóıledi, olardyń barlyǵy da Qazaqstanda jumys isteýge nıeti bar. Osy rette biz bul qatynastardy paıdalanýymyz kerek. Atap aıtqanda, Ońtústik Koreıa basshylyǵy, jalpy memleket bizdi úlken qurmetpen qarsy aldy», - dedi.
Sonymen qatar Elbasy sapar aıasynda ekijaqty bıznes-forým ótkenin, osy oraıda 1,5 mlrd dollarǵa jýyq qarjyǵa kelisimshart jasalǵanyn atap ótti. Munymen qosa, Prezıdent jasalyp jatqan eń úlken jumystyń biri Balqashtaǵy jylý elektr stansasyna qatysty ekenin eske saldy.
«Biz koreı kompanııalarynyń, sonyń ishinde LG kompanııasynyń gaz-hımııa kesheniniń iri jobasyna atsalysýy jóninde áńgimelestik», - dedi Memleket basshysy.
N. Nazarbaev bul el Qazaqstanǵa zor qyzyǵýshylyq tanytyp, elimizden barǵan delegatsııaǵa aıryqsha yqylas bildirgenin, sondaı-aq tıisti qujattarǵa, Koreıa úshin Qazaqstannyń Ortalyq Azııadaǵy strategııalyq mánin aıqyndaıtyn birlesken málimdemege qol qoıylǵanyn jetkizdi.
«Meniń shet elderge 2016 jyldyń sońyndaǵy syrtqy ekonomıkalyq saparlarym jaqsy nátıjelermen aıaqtalýda. Biz jańadan dostar taýyp, áriptestermen birge baǵytymyzdy aıqyndadyq», - dedi Nursultan Nazarbaev.
Sóz sońynda Prezıdent bul baǵyttaǵy atqarylǵan kelissózder Qazaqstan ekonomıkasynyń damýyna, búkil halyqtyń ál-aýqatyn odan ári jaqsarýyna eleýli paıdasyn tıgizetinin atap ótti.
