El óńirleri jylý maýsymyna daıyn ba

ASTANA. KAZINFORM — El aýmaǵynda jylý maýsymyna daıyndyq jumysy týraly Energetıka vıtse-mınıstri Suńǵat Esimhanov aıtyp berdi.

— Qysqa daıyndyq turaqty júrip jatyr. Jylý ortalyqtarynyń bekitilgen júıeli kestesi bar. Qazir 10 energoblok, 63 qazandyq pen 39 týrbınany kúrdeli jóndeýden ótip jatyr. Qalǵany aǵymdyq jóndeýden mindetti túrde ótedi. Sondaı-aq búginde 5 energoblok, 30 qazandyq, 18 týrbına boıynsha jumys júrip jatyr. Jalpy stansalary jaǵynan jóndeý jumystary keste boıynsha tolyq kólemde júzege asyp jatyr, — dep jaýap berdi Suńǵat Esimhanov Úkimet úıinde ótken baspasóz máslıhatynda agenttik tilshisiniń saýalyna.

Odan ári mınıstrdiń orynbasary jylý jelileriniń qysqa daıyndyǵyn sóz etti. 

— Óńirlik keste bar, mysaly stansalardy respýblıkalyq kestemen qarastyrsaq, jelilerdi jóndeý ýaqyty men kólemin ár óńir ózi bekitedi. Bul jumysty Ónerkásip jáne qurylys mınıstrligimen birge qadaǵalap otyrmyz. Birinshi kezekte tarıften bólinetin qarajat esebinen, ekinshi kezekte respýblıkalyq bıýdjetten bıyl 40 mlrd teńge qarajat bólindi. Sol qarajattyń esebinen jáne qosymsha jóndeý kezinde anyqtalǵan tustarǵa Úkimet rezervinen bólinetin tıisti qarajat esebinen júzege asyp jatyr. Sondyqtan bul baǵyttaǵy jumys tolyq baqylaýda. Barlyq nysan jylýmen qamtamasyz etiledi, — dep ýáde berdi vıtse-mınıstr.

Aıta ketsek, bıyl elimizde 105 gıdrotehnıkalyq qurylysqa tekserý júrgiziledi. 

Sondaı-aq Úkimet basshysynyń orynbasary Qanat Bozymbaev artta qalǵan óńirlerdi respýblıkalyq bıýdjetten qarjylandyrýǵa basymdyq beriletinin aıtyp otyr.