El óńirlerinde 93504 adam onlaın sanaqtan ótti

NUR-SULTAN. QazAqparat - Búgin, 3 qyrkúıekte saǵat 9:00-degi jaǵdaı boıynsha 93504 respondent onlaın sanaqtan ótti. Olardyń 83188-i sanaq.gov.kz saıtynda, 8639 Egov portalyndaǵy saıt siltemesin paıdalana otyryp jaýap berse, 1677 adam sanaqqa Aitu qosymshasy arqyly qatysty, dep habarlaıdy QazAqparat Ulttyq statıstıka bıýrosynyń baspasóz qyzmetine silteme jasap.

Alǵashqy eki kúnniń qorytyndysymen Pavlodar oblysy alda kele jatyr. Aımaqta 16075 adam sanaqtan ótken. Odan keıingi orynda Nur-Sultan qalasy tur. Elordalyqtardyń 15509-y sanaq saýaldaryna jaýap bergen. Bul kórsetkish boıynsha ázirge sońǵy eki oryn Mańǵystaý jáne Atyraý oblystarynyń enshisinde. Bul óńirlerde sáıkesinshe 1406 jáne 1230 adam sanaqtan ótipti.

Sanaq paraqtaryndaǵy keıbir saýaldarǵa qatysty turǵyndar tarapynan syn aıtylǵan edi. Máselen, «Turǵyn úılerdiń (turǵyn ǵımarattardyń) syrtqy qabyrǵalarynyń materıaldaryn kórsetińiz» degen saýal ne úshin qoıylǵany týraly suraq kóterildi. Aıta keterligi, buǵan qatysty 11 túrli jaýap nusqasy qarastyrylǵan. Budan bólek saýaldardyń arasynda úıdiń ınfraqurylymmen qamtylý deńgeıin anyqtaýǵa baǵyttalǵandary da bar. Bul saýaldardyń jaýaby arqyly ár eldi meken, tutas memlekettegi turǵyn úı qorynyń jaı-kúıi jan-jaqty saraptalatyn bolady.

Taǵy bir talqyǵa túsken suraqtardyń biri – «Siz qansha tiri bala týdyńyz?». Sonymen qatar nelikten suraqqa áıelder 15 jastan bastap jaýap berýi kerek degen pikir aıtylýda.

Aıta keterligi, Halyq sanaǵy bıyl 61 memlekette ótedi. Al BUU jarııalaǵan raýndqa sáıkes, 2020 jylǵa meıilinshe jaqyn merzimde barlyq memleketterde ótpek. Máselen bizdiń elde 16 jastan bastap turmys qurýǵa múmkindik beriledi. Ózge memleketterde bul kórsetkish tómen bolýy múmkin. Sondyqtan halyqaralyq deńgeıde málimetterdi birizdendirý maqsatynda osy jas kórsetkishi belgilengen. Al tiri týǵan balalar jónindegi saýalǵa keler bolsaq, bul saýal Eýropalyq statıstıkter konferentsııasynyń usynysy boıynsha qosymsha kórsetkishterdi anyqtaý úshin qosyldy. Budan bólek, saýalnama qorytyndysy boıynsha náresteler ólimi kórsetkishin naqtylaý júrgizilmek. Bul jerde naqty sanaq júrgizilgen ýaqyttaǵy eldiń demografııalyq bet-beınesi kórsetiledi.

Halyqaralyq uıymdardyń keńesimen qosylǵan saýaldardyń ishinde azamattardyń densaýlyq jaǵdaıyna qatystysy da bar. Máselen, kórý, estý, júrý jáne este saqtaý qabiletine baılanysty naqtylaýshy suraqtar engizilgen.

Balalarǵa qatysty tabysy týraly suraq qajet pe? degen saýal da kópshiliktiń nazaryna ilikti. Birinshi kezekte atap ótý kerek, kámelet jasyna tolmaǵandar úshin olardyń jaqyndary, ata-anasy jáne qamqorshylary toltyra alady. Bul jerde balanyń tabysy degen suraqta «Týǵan -týysqandardan nemese jaqyndardan (solardyń asyraýynda) basqa materıaldyq kómek» degen nusqa bar. Sondaı-aq, balaǵa qatysty belgilengen tólemder bar. Ol áleýmettik járdemaqy alıment bolýy múmkin. Al jumys isteýge ruqsat etilgen jastan bastap, onyń tabysyn kórsetýge bolady. Sanaqtyń eń alǵashqy kezeńinde bir adam basqa da otbasy múshelerin tańdaı otyryp, ózi toltyrýyna múmkindigi bar. Osylaısha bir respondentti ǵana emes, jalpy otbasynyń tabys kórsetkishteri boıynsha da jalpylama málimet ázirlenedi.

Ulttyq statıstıka bıýrosy azamattardyń belsendiligi úshin alǵys aıta otyryp, sanaqty onlaın ótýge shaqyrady. sanaq.gov.kz saıty 15 qazanǵa deıin táýlik boıy qoljetimdi bolmaq. Onlaın sanaqtan ótpegender 1-30 qazan aralyǵynda ıntervıýerlerdiń saýaldaryna jaýap bere alady. Barlyq saýaldar boıynsha 1446 baılanys ortalyǵyna habarlasýǵa bolady. Qońyraý shalý tegin.