El dańqyn asqaqtata beremiz - bokstan Azııa chempıonatynyń jeńimpazdary
Aslanbek Shymbergenov, Qazaqstan erler quramasynyń kapıtany jáne 71 kelige deıingi salmaq dárejesindegi altyn medal ıegeri:
- Jalpy, Azııa chempıonaty joǵary deńgeıde ótti, aqtyq aıqas ońaı bolmady. Men jergilikti sportshymen kúsh synasyp, Allaǵa shúkir, jeńdim. Fınalda qarsylasym Zııad Ishaısh boldy. Ol álige deıin kóńilsiz, ony jubatýǵa tyrystym. Buǵan deıin biz Azııa oıyndarynda rıngide kezdeskenbiz, ol kezde de ony jeńgen edim.
Barlyq jattyqtyrýshylarǵa, dárigerler men massaj jasaýshylarǵa, Boks federatsııasynyń prezıdenti Keńes Hamıtulyna (Rakıshev – avt.), Mádenıet jáne sport mınıstrligine alǵys aıtamyn. Búkil Qazaqstanǵa jáne jankúıerlerge qoldaýlary úshin rahmet, úmitterińizdi áli de aqtaımyz.
Sanjar Tashkenbaı, 48 kelige deıingi salmaq dárejesinde altyn medal ıegeri:
- Qazaqstandyqtarǵa sálem, jankúıerlerge osyndaı qoldaý bildirgeni úshin kóp rahmet. Biz búgin jeńiske jetip, 6 altyn medal aldyq. Otbasyma jáne Qazaqstanǵa, bizdiń federatsııaǵa zor alǵys aıtamyn.
Meniń qarsylasym ońaıǵa túspedi, Japonııa sportshysy. Onyń jeńe aldym. Aldaǵy ýaqytta da el týyn jelbiretemin degen úmittemin.
Mahmud Sabyrhan, 54 kelige deıingi salmaq dárejesinde kúmis medal ıegeri:
- Búgin Azııa chempıonatynda taǵy bir «kúmis» aldym. Osylaı myqty bola túsemiz, alda áli talaı kúshti jarystar bar. Maqsatym – elimiz ben týymyzdy ári qaraı asqaqtatý.
Aqtyq synda qolymnan kelgenniń bárin jasadym. Birinshi raýndyda tóreshi qarsylasyma jeńis berdi. Biraq, óz basym mundaı eseppen jeńildim dep eseptemeımin. Osydan keıin ekinshi jáne úshinshi raýndyda 2:3 jáne 3:2 boldy. Qazir nege ekenin naqty aıta almaı otyr. Úıge barǵan soń aıqasty asyqpaı taǵy qaraımyn. Úshinshi raýndyda jeńdim dep oıladym, sebebi qarsylasym sharshap qaldy. Búıirden birneshe soqqy jiberip alǵanymdy moıyndaımyn.
Sáken Bıbosynov, 51 kelige deıingi salmaq dárejesinde kúmis medal ıegeri:
- Assalaýmaǵaleıkým, qurmetti qazaqstandyqtar. Búgingi aıqasta qarsylasyma ese jiberip, ekinshi oryn aldym. Jekpe-jek kezinde qatelikter jibergenimdi moıyndaımyn, jattyqtyrýshylar qoıǵan ádisti durys qoldana almadym. Bul qatelikter bolashaqtaǵy aıqastarǵa sabaq bolady dep esepteımin, endi budan da kúshtirek bola túsemin.
Mádenıet jáne sport mınıstrligine, Boks federatsııasyna jáne Keńes Hamıtulyna qoldaýlary men bizge jasaǵan barlyq jaǵdaılary úshin alǵys aıtamyn. Bizdiń jigitterge sáttilik tileımin, bizdiń týymyz árqashan ózgelerden bıik tursyn. Jankúıerler, sizderge myń alǵys, biz áli de jetistikterimizben qýantamyz.
Eske salsaq, keshe qazaqstandyq boksshylar qurlyqtyq dodany 3 altyn, 6 kúmis, 3 qola medalmen túıindedi. Qazaqstandyq boksshylar qurlyq birinshiliginde jalpy sany 21 medal jeńip aldy, sonyń altaýy – altyn, jeteýi – kúmis, segizi – qola. Elimizdiń erler quramasy medaldar kestesinde 2-orynǵa ıe boldy.
Aıta ketsek, Sanjar Táshkenbaı (48 keli) men Aslanbek Shymbergenov (71 keli) jáne Aıbek Oralbaı (92 keli) Azııa chempıony boldy.
Al, Sáken Bıbosynov (51 keli), Mahmýd Sabyrhan (54 keli), Serik Temirjanov (57 keli), Dýlat Bekbaýov (67 keli), Nurqanat Raıys (75 keli) jáne Qamshybek Qońqabaev (92 keliden joǵary) kúmis medaldi qanaǵat tutty.
El quramasynan Samaálı Tóltaev (60 keli), Nurbek Oralbaı (80 keli), Saǵyndyq Toǵambaı (86 keli) qola júlde aldy.
