El azamattarynyń quqyqtyq, qarjylyq saýaty áli de tómen - Erlan Qoshanov

ATYRAÝ. QazAqparat – Atyraýda Amanat partııasynyń «Quqyqtyq kómek» jobasy iske qosyldy. Oǵan partııa tóraǵasy Erlan Qoshanov qatysty, dep habarlaıdy QazAqparat tilshisi.

Erlan Qoshanov aldymen Atyraý oblysynyń jurtshylyǵymen kezdesti. Quqyq qorǵaýshy Abzal Quspanmen birge Isataı aýdanynyń turǵyndaryn qabyldady.

«Jasyratyny joq, bizdiń qoǵamda azamattardyń quqyqtyq, qarjylyq saýattylyǵy áli de tómen. Sonyń saldarynan olar sotta nemese basqa da memlekettik organdarda óz múddelerin qorǵaı almaı jatady. Shalǵaıdaǵy aýyl turǵyndarynyń bári birdeı mundaı kásibı kómekke qol jetkize almaı otyrǵandyqtan, jańa partııalyq joba aıasynda zańgerler aýyl-aýyldy aralap, halyqqa arnaıy quqyqtyq kómek kórsetedi. Ádildik pen zańnyń ústemdik qurýy osyndaı naqty isterden bastalady», - dedi Erlan Qoshanov.

Onyń aıtýynsha, «Quqyqtyq kómek» jobasy sheńberinde zańgerler azamattarǵa zańgerlik kómek kórsetý úshin aýdan ortalyqtaryna barady. Sotta, qylmystyq qýdalaý organdarynda jáne taǵy basqa jaǵdaıda azamattarǵa ókilettik etýge, talap aryzyn toltyrýǵa, ózin qorǵaýǵa kómek kórsetiledi. Turǵyndarǵa qarjy jáne quqyqtyq máseleler boıynsha túrli keńes beriledi.

Sondaı-aq, Erlan Qoshanov oblystyq fılıaly janynan ashylǵan «Amanat service» keńes berý ortalyǵynyń qyzmetimen tanysty. Munda bir tereze qaǵıdatymen memlekettik organdardyń, Otbasy bank pen E-gov ókilderi azamattardyń ótinishterin qabyldaıdy. Sáýlet, eńbek, turǵyn úı qatynastary salasy jáne halyqty tolǵandyratyn ózge de máseleler boıynsha zańnamany túsindiredi.

Aıta keteıik, qazir oblystaǵy 106 bastaýysh partııa uıymynda 23 myńnan astam múshe bar.