El aımaqtaryndaǵy jıhaz baǵasy qansha
ASTANA. KAZINFORM – Úıge arzan jıhaz alyp bólmelerdi jabdyqtaýdy oılasańyz, joǵary sapaǵa úmit artpaı-aq qoıǵanyńyz durys, dep habarlaıdy Kazinform tilshisi.
Jıhaz salondary men Qazaqstandaǵy jergilikti fabrıkalarda tańdaý joǵary. Baǵasy tómen bolǵanymen keıde sapasy kóńilden shyqpaı jatady. Sondyqtan jıhaz jasaǵan kezde qandaı materıaldyń qoldanylǵany mańyzdy ról atqarady. Kóbine aǵash úgindisi nyǵyzdalǵan taqtany tańdaıdy. Bul materıaldan árıne berik, uzaq jyl qyzmet etetin jıhaz daıyndaý qıyn. Ásirese as úı jıhazyna jıi sý tıedi.
Al kereýet nemese shkaf daıyndaǵan kezde aǵash úgindisi nyǵyzdalǵan taqtany tańdaý artyqtyq etpeıdi. Kútip ustasa ondaǵan jyl qoldanýǵa bolady.
Jumsaq jıhaz baǵasyna aǵashtyń sapasy ǵana emes, astary, qaptamasynyń neden jasalǵany, beriktigi áser etedi. Qajetti quraldardy óndirýshiler kóp. Tańdaý kezinde baǵasy qoljetimdisin, sonymen birge ımport taýarlardy da usynýy múmkin.
Jumsaq ári qarapaıym
Reıtıng jasaǵan kezde uzyndyǵy 2,4 metr bolatyn dıvan baǵasyn surastyrdyq. Úsh adam erkin syıatyn dıvan baǵasy elimizde qymbat emes.
Eń arzan jıhaz Qaraǵandydan tabyldy. Munda baǵa 120 myń teńgeden bastalady. Odan keıingi orynda Oral qalasy tur. Onda dıvan baǵasy 140 myń teńgeden bastalady.
Elimizdegi qalalardyń kóbinde baǵa 150 myń teńge ekenin ańǵardyq. Taraz, Qyzylorda, Túrkistan, Ekibastuz, Astana, Jezqazǵan men Taldyqorǵandaǵy baǵa osyndaı. Mundaı dıvandar kóbine jazylmaıdy, keıbirin eki adamdyq kereýetke ǵana aınaldyrýǵa bolady.
Pavlodarda dıvan baǵasy 155 myń teńgeden bastalady. Qostanaı men Petropavldaǵy baǵa 160 myń teńge jáne odan joǵary. Dıvan baǵasy 200 myń teńge bolatyn óńirler de bar. Olar: Aqtóbe, Shymkent, Aqtaý, Kókshetaý jáne Almaty qalalary. Al Atyraýdaǵy baǵa – 210 myń teńge. Óskemen men Semeıde eń arzan dıvan baǵasy – 250 myń teńge.
Arzan, biraq matrassyz
Eki adamdyq kereýet baǵasy elimizde qoljetimdi. Tek kereýet jasatqan kezde matrasyn qosa bermeýi de múmkin. Kóbine tutynýshylar ony bólek satyp alady. Baǵasy 20 myń teńgeden bastalady. Arzan kereýette qosymsha tarpasy bolmaıdy, jumsaq tósenish te qarastyrylmaǵan.
Tarazda eń arzan kereýet baǵasy – 60 myń teńge. Oral qalasynda – 66 myń teńge. Al elordada baǵa 76 myń teńgeden bastalady. Qaraǵandy qalasyndaǵy baǵa – 80 myń teńge. Shymkent qalasynda da baǵa sol shamada. Kereýet quny – 90 myń teńge.
Qazaqstannyń keıbir qalasynda baǵa 100 myń teńgeden joǵary. Olar: Ekibastuz, Óskemen, Semeı jáne Túrkistan. Al Aqtóbe, Taldyqorǵan men Petropavl qalalarynda eki adamdyq kereýetti 110 myń teńgege jasap beredi.
Jezqazǵan men Pavlodarda kereýet quny 120 myń teńgeden bastalady. Bul jıhaz da aǵash úgindisi nyǵyzdalǵan taqtadan jasalyp, túrli qosymda elemetteri tańdalady. Qostanaıdaǵy baǵa – 125 myń teńge.
Odan ary Qyzylorda qalasy tur. Kereýet baǵasy – 130 myń teńgeden. Aqtaý men Almatyda kereýetti 150 myń teńgege satyp alasyz. Al Atyraýda 160 myń teńge jáne odan joǵary.
Arzan, esesine uzaqqa shydamaıdy
Páterdegi eń mańyzdy bólme – as bólmesi. As úı jıhazyn da qoljetimdi baǵaǵa jasatyp alýǵa bolady. Biz uzyndyǵy 1,8-2 metr bolatyn jıhazdyń baǵasyn bildik. Keıde daıynyn da satyp alýǵa bolady. Mundaıda ólshep, qondyrý kúnin kútip júrmeısiz. Taǵy bir eskeretin jaıt bar.
Baǵa barlyq jerde birdeı tómen emes. Sonymen birge sapasyna qaraı quny óse beredi.
As úı jıhazynyń eń arzany Shymkent qalasynda satylyp jatyr. Quny 80 myń teńge jáne odan joǵary. Sodan keıingi orynda Túrkistan qalasy tur. Baǵa – 100 myń teńge. Kókshetaýdaǵy baǵa 115 teńge jáne odan joǵary bolyp tur.
Qyzylorda qalasynda as úı jıhazy – 130 myń teńge. Al Qaraǵandy, Astana, Atyraý, Taraz, Taldyqorǵan men Almaty qalalaryndaǵy baǵa 150 myń teńge jáne odan joǵary.
Petropavlda eń arzany 158 myń teńge eken. Al Oraldaǵy baǵa – 173 myń teńge. Aqtaý men Ekibastuzda as úı jıhazyn 180 myń teńgege jasap beredi.
Qostanaı, Jezqazǵan, Pavlodar, Óskemen men Semeıde eń arzany – 200 myń teńge. As úı jıhazy Aqtóbede qymbat bolyp shyqty. Baǵasy 220 myń teńgeden bastalady. Aıtyp ótelik, kóp jerde bólip tóleý arqyly alýǵa bolady.
Eske salsaq, buǵan deıin elimizdegi jekemenshik balabaqshalardyń qyzmet kórsetý quny týraly jazyldy.