EQYU Sammıti qarsańynda: «Bul Sammıttiń biz úshin jóni bólek»
«Izvestııa» gazeti 9 qarasha kúngi sanynda «Ý Kazahstana est shans voıtı v ıstorııý» degen taqyryppen suhbat jarııalady. Suhbat berýshi Ulybrıtanııa Birikken Koroldiginiń Soltústik Irlandııa men Qazaqstandaǵy jáne Qyrǵyzstandaǵy elshisi Devıd Moran. «Qazaqstan TMD keńistiginde EQYU-ǵa tóraǵalyq etip otyrǵan tuńǵysh memleket ekendigine maqtanýy kerek. Qazaqstannyń Syrtqy ister mınıstrligi tóraǵalyq isin jaqsy uıymdastyrdy. Bul ásirese, Qazaqstannyń Qyrǵyzstanda bolǵan jaǵdaılarǵa qatysty jedel ári tıimdi sheshim qabyldaı bilýinen jaqsy kórindi. Árıne, uzaq jyldar boıy jalǵasyn taýyp kele jatqan shıelenisterdi bir jylda sheship tastaý múmkin emes. EQYU-da shıelenisterdi sheshetin myqty tetik bar, biraq óte ıkemdi uıym bolýy kerek jáne tóteden bolǵan problemalar boıynsha jedel qadamdar jasaı bilýi úshin Uıymnyń tóraǵasyna erkindik berý kerek. Biz Sammıt barysynda osy salalar boıynsha ınstıtýtsııalyq tabystarǵa qol jetkizý úshin Qazaqstanmen birlesip jumys istegendi jón kórip otyrmyz. Qoryta aıtatyn bolsaq, Qazaqstannyń EQYU-ǵa tóraǵalyǵy naqty nátıjeler boıynsha baǵalalanatyn bolady. Al Sammıttiń nátıjeleri progrestiń eń úzdik kórsetkishteri bolady», - deıdi Elshi.
***
«Ekspress K» basylymynyń 10 qarasha kúngi sanynda «Oshıbka Redıarda Kıplınga» atty maqala jarııalandy. Onda elimizdiń EQYU-ǵa tóraǵalyǵy týraly keleli máseleler qozǵalǵan jáne tóraǵalyqqa qatysty ártúrli sarapshy mamandar men halyqaralyq uıymdar ókilderiniń pikirleri jarııalanǵan. EQYU-nyń Qyrǵyzstandaǵy ókildiginiń basshysy Endrıý Tezorerdiń pikirinshe, Qazaqstan Qyrǵyzstan ekonomıkasyn qalpyna keltirý isine alǵashqylardyń biri bolyp umtyldy. «EQYU-nyń Іs basyndaǵy tóraǵasynyń bastamasymen shilde aıynda Qyrǵyzstandaǵy jaǵdaılarǵa arnalǵan halyqaralyq konferentsııa ótti. Onyń barysynda qyrǵyz eline 1 mlrd. dollar kóleminde qarjylaı kómek kórsetý týraly kelisim jasaldy. Astana bolsa Bishkekke óz tarapynan 10 mln. dollarǵa jýyq qarjy berdi. Qazaqstan etnıkalyq tolqýlardyń aımaqqa jyldam tarap ketý yqtımaldyǵyn birden túsindi jáne onyń áreketteri bos sózge emes, naqty iske negizdeldi. Qazaqstan ekonomıkalyq kómekti qamtamasyz etý maqsatynda donorlardy ortaq maqsatqa óte sátti jumyldyra bildi», - deıdi E. Tezorer.
***
«Kazahstanskaıa pravda» basylymynyń 11 qarasha kúngi sanynda «Podvodıa ıtogı mıssıı» degen taqyryppen maqala basyldy. Basylymnyń jazýynsha, Qazaqstannyń EQYU-ǵa tóraǵalyǵy barysynda atqarǵan jumystar Almatydaǵy dóńgelek ústel otyrysynda talqylanǵan. Sharada sóz sóılegen EQYU-nyń Astanadaǵy ókildiginiń basshysy Aleksandar Kelchevskıı aldaǵy Astana Sammıtti aǵymdaǵy jyly qaýipsizdik máselesine qatysty qolǵa alynyp otyrǵan eń mańyzdy shar bolatynny atap kórsetken. «Menińshe, Sammıt qaýipsizdikti qamtamasyz etý baǵytyndaǵy sońǵy kezeń emes. Ol, kerisinshe, osy baǵyttaǵy jumystarǵa jańasha jol ashady. Sammıtte qabyldanǵan sheshimderdi keıinirek Eýropa elderi jalǵastyratyn bolady. Men aldaǵy jıyn kópshilik qaýymnyń talqysyna salynyp otyrǵan máselelerdi sheshýge baǵyttalǵan jumystarǵa tyń serpin berse eken degen oıdamyn. Sondaı-aq menińshe, Qazaqstan men Ortalyq Azııa aımaǵy eýroatlantıkalyq jáne eýrazııalyq keńistiktegi qaýipsizdikti qamtamasyz etý isine úlken úles qosady dep oılaımyn», - deıdi A.Kelchevskıı.
***
«Egemen Qazaqstan» gazetiniń 13 qarashadaǵy sanynda Májilis tóraǵasynyń orynbasary EQYU-nyń Іs basyndaǵy tóraǵasynyń Qyrǵyzstan boıynsha Arnaıy ókili Jánibek Káribjanovtan alynǵan suhbat jarııalandy.Suhbattyń taqyryby - «Tynyshtyq arqyly - turaqtylyqqa, tatýlyq arqyly - tutastyqqa» dep atalady.
«Qazaqstan halyqaralyq uıymǵa tóraǵalyq jasaýǵa kiriseriniń aldynda maqsat etken is-sharalarynyń basym kópshiligin oryndady dep nyq senimmen aıtýǵa bolady. EQYU-ǵa múshe memleketter qazirdiń ózinde Qazaqstan uıymǵa tóraǵalyqty abyroımen atqaryp keledi degen pikir bildirýde. Uıymǵa tóraǵalyqty óz deńgeıinde atqarýymyz elimizdiń bedeli men mártebesin kóterýde. Ekinshiden, halyqaralyq qoǵamdastyqtyń Qazaqstanǵa degen oń kózqarasyn ári qaraı nyǵaıtýda. Úshinshi jaǵynan, tóraǵalyq bizdiń elimizdiń qazirgi kezdegi ustanǵan saıasatyn odan ári damytýǵa jol ashty. Dálirek aıtqanda, úlken múmkindik berdi. Sonymen qatar biz, bedeldi halyqaralyq Uıymǵa tóraǵa retinde EQYU-nyń aldaǵy kezeńderdegi tynys-tirshiligin keńeıtýge ózimizdiń úlesimizdi qosyp kelemiz», deıdi J. Káribjanov suhbatynda.
Sondaı-aq «Egemen Qazaqstannyń» 13 qarasha kúngi nómirinde «Qazaqstan tóraǵalyǵy ortaq tańdanys týdyrýda» atty maqala basyldy. Maqalaǵa Memleket basshysy Nursultan Nazarbaevtyń Ujymdyq qaýipsizdik sharty uıymynyń Bas hatshysy Nıkolaı Bordıýjany qabyldaǵan kezde talqylanǵan máseleler arqaý bolǵan. Kezdesýde N. Bordıýja Qazaqstannyń EQYU-ǵa tóraǵalyǵy Ujymdyq qaýipsizdik sharty uıymyna múshe memleketterdiń keńistigindegi qaýipsizdik júıesine tıisinshe yqpal etetinin atap kórsetken. «Qazaqstannyń EQYU-ǵa tóraǵalyǵy kezeńinde Qyrǵyz Respýblıkasyndaǵy oqıǵalar oryn aldy jáne Qazaqstannyń tóraǵalyǵymen Qyrǵyzstandaǵy problemalar sheshimin tapty. Munyń mańyzdylyǵy sonda, EQYU óz jumysy aıasynda alǵash ret óz qyzmetin UQShU-men jáne ózge de halyqaralyq qurylymdarmen úılestire bildi. Bizdiń ókilderimiz Qyrǵyzstandaǵy qaıǵyly oqıǵalar barysynda qyrǵyz halqyna kómek kórsetý úshin turaqty túrde kezdesýler ótkizdi, ózderiniń saraptamalary boıynsha aqparattar almasty, eń tıimdi sharalardy talqylady. Bul óte mańyzdy ári nátıjeli boldy», - deıdi N.Bordıýja.
***
«Aıqyn» gazetinde Aýyl sharýashylyǵy ǵylymdarynyń doktory, akademık Raqymjan Eleshovtan alynǵan suhbat «Bul Sammıttiń biz úshin jóni bólek» degen taqyryppen jarııalandy. Ǵalymnyń aıtýynsha, Alla buıyrtsa, bıylǵy 1 jeltoqsanda sársenbiniń sátti kúni, EQYU-nyń jetinshi Sammıti Astanada óz jumysyn bastamaqshy. «Qazaq úshin jeti sany da, aptanyń sársenbisi de qasıetti bolyp esepteletinin bárimiz bilemiz. Osy eki qasıetti belginiń bir kúnge oraılasyp, elimizde 56 el basshylarynyń basyn toqaılastyratyn úlken alqaly jıyn belgilengen ýaqytqa dóp kelýiniń ózi tańǵaldyrmaı qoımaıdy. Bul zańdylyq pa, álde kezdeısoqtyq pa? Ádette, ómirde eshteńe de, eshnárse de kezeısoq bolmaıdy desedi. Soǵan qaraǵanda, bul bizdiń eldiń ǵalam aldyndaǵy úlken mıssııany abyroımen atqaryp, osy sammıtte memleket basshylary uıym aldyndaǵy mindettemelerdi júzege asyrýdyń jańa tetikerin bekitip, osy ýaqytqa deıingi sylbyrlyqqa salynyp, júzege asyrylmaı kele jatqan belgilengen mindettemelerge jan bitirip, saıası erik-jigerlerge qozǵaý salatyn bolar degen senimdemiz», deıdi R.Eleshov. Suhbat «Aıqyn» gazetiniń13 qarasha kúngi nómirinlde basylǵan.
