EQYU keńistiginde ultaralyq jáne dinaralyq qatynastardyń mańyzy arta tústi - Q. Mamı
Qaırat Mámı Venada Uıymnyń Bas hatshysy Lamberto Zanermen kezdesti.
Senat Tóraǵasy bul kezdesý bizdiń elimizdiń Eýropadaǵy qaýipsizdik jáne yntymaqtastyq uıymyna kirgenine 20 jyl tolatyn jyly ótip otyrǵanyn atap ótti.
- «Osy jyldarda biz EQYU qyzmetiniń aýqymdy máseleleri boıynsha tyǵyz yntymaqtastyq pen is júzindegi ózara is-qımyldy óristettik»,- dedi Q.Mámı.
Q.Mámı atap ótkendeı, qazirgi kezde EQYU keńistiginde ultaralyq jáne dinaralyq qatynastardyń mańyzy arta tústi. Eýropada qalyptasqan qundylyqtar júıesi men jedel ósip kele jatqan ulttyq dıasporalardyń mádenıetteri arasyndaǵy dúrdarazdyq baıqalady.
Osyǵan baılanysty tóraǵa «qazirgi kezde EQYU jaýapty aımaqta órkenıetaralyq, mádenıetaralyq jáne dinaralyq únqatysýdyń qajettigi ótkir sezilip otyr. Biz ultshyldyqty, dinı tózbeýshilikti, násilshildikti, jatsyný men antısementızmdi jeńý úshin EQYU áleýetin belsendi túrde paıdalanýdy jaqtaımyz»,- dep atap ótti.
Odan basqa Senat Tóraǵasy Qazaqstan Parlamenti Májilisiniń parlamenttik saılaý qorytyndylary týraly habardar etip, «elimizdiń saıası damýy úshin saılaýdyń mańyzy zor»,- dep atap ótti.
Onyń aıtýynsha, «Parlamenttiń tómengi palatasyna úsh partııanyń ótýi pikirsaıystar men ıdeıalardyń básekelestik deńgeıin arttyryp, Parlamenttiń jáne tutastaı elimizdiń saıası júıesin nyǵaıtady».
Ústimizdegi jyldyń 30-31 mamyrynda Astana qalasynda Álemdik jáne dástúrli dinder lıderleriniń IV Sezi ótetini týraly aıta kelip, Q.Mámı «dinı forýmnyń basty maqsaty halyqaralyq qaqtyǵystardy sheshýdegi álemdik dinderdiń dinı jáne adamgershilik áleýetin biriktirý bolyp tabylady»,- dep atap ótti.
- «Qazaqstan Prezıdenti N.Nazarbaevtyń Astanada Álemdik jáne dástúrli dinder lıderleriniń Sezin ótkizý týraly bastamasy halyqaralyq turǵyda moıyndaldy»,- dedi tóraǵa.
EQYU Bas hatshysy Lamberto Zaner óz kezeginde mádenıetaralyq jáne dinaralyq únqatysýdy ilgeriletýdegi Qazaqstan rólin joǵary baǵalaı kelip, «toleranttyq máselesi EQYU kún tártibinde birinshi orynda tur»,- dep atap ótti.
- «Biz óz tarapymyzdan Qazaqstan Elbasynyń Álemdik jáne dástúrli dinder lıderleriniń Sezin ótkizý týraly bastamasyn quptaımyz»,- dedi EQYU Bas hatshysy.
L.Zaner 2010 jyly Qazaqstan EQYU-ǵa tabysty tóraǵalyq etkenin aıta kelip, «Qazaqstan Respýblıkasy men EQYU elderiniń parlamenttik toptary arasyndaǵy tyǵyz yntymaqtastyqty odan ári qalyptastyrý óte mańyzdy»,- dep atap ótti.
