EQYU daǵdarys jaǵdaılaryn sheshýde mańyzdy rolge ıe bolýy múmkin - Bojko
Mundaı pikirdi Májilis tóraǵasynyń orynbasary Vladımır Bojko Mınskide ótken EQYU Parlamenttik Assambleıasy komıtetiniń qaýipsizdik jáne saıası máseleler jónindegi jalpy otyrysynda málimdedi, dep habarlaıdy Májilistiń baspasóz qyzmeti.
5-9 shilde kúnderi Belarýs astanasynda ótip jatqan EQYU PA-ynyń 26-ynshy sessııasy ózara senimdi nyǵaıtý jáne álem úshin yntymaqtastyq pen EQYU aýmaǵyndaǵy damý máselelerin talqylaý maqsatyn kózdeıdi.
«Qazirgi tańda Eýropadaǵy jaǵdaı men EQYU keńistigindegi barlyq elderge tikeleı áseri bar «DAISh» uıymynyń yqpaly jáne Taıaý Shyǵys elderi men Ońtústik Jerorta teńizindegi shıelenisterdiń jalǵasyp jatqan kezinde qaýipsizdik pen yntymaqtastyq máseleleri erekshe mańyzdy», - dedi Májilistiń vıtse-spıkeri.
Bojkonyń aıtýynsha, Qazaqstan Ýkraına jáne Sırııa shıelenisterin retteý boıynsha mámilegerlik áreketter jasaýǵa daıyn. Májilis vıtse-spıkeri aıtyp ótkendeı, Qazaqstan Prezıdenti Nursultan Nazarbaevtyń Reseı jáne Ýkraın taraptaryn jaqyndastyrýǵa salǵan kúshiniń nátıjesinde Mınsk kelisimderi jasaldy. Qazaqstandyq parlamentshi sondaı-aq, Sırııa daǵdarysy aıasynda Jeneva kelissózderin tolyqtyrýshy Astana protsesi iske qosylǵandyǵyn eske sala ketti.
Osyǵan oraı, Bojko 4-5 shilde kúnderi Astanada ótken Sırııa máseleleri jónindegi kelissózderdiń nátıjeli bolatyndyǵyna jáne onyń áskerı satydan dıplomatııalyq satyǵa ótetindigine senim bildirdi.
