«Ekstrasens jaldaǵan býkmekerlik keńse» - baspasózge sholý
***
"Keshe Býrabaıda Memleket basshysy Nursultan Nazarbaevtyń tóraǵalyǵymen Qazaqstan Prezıdentiniń janyndaǵy Shetel ınvestorlary keńesiniń jalpy otyrysy ótti", dep jazady "Egemen Qazaqstan" gazeti " Tartymdy ınvestıtsııalyq ahýal - el ekonomıkasyn damytýdyń negizi" atty maqalada.
Basylymnyń atap kórsetýinshe, Memleket basshysy Qazaqstan úshin qazirgi ótkizý naryqtaryn keńeıtýge jáne yntymaqtastyqty nyǵaıtýǵa múmkindik beretin Eýrazııalyq ekonomıkalyq odaqtyń mańyzdylyǵyna toqtaldy. Bizdiń elderimizdiń arasynda tıimdi ekonomıkalyq baılanystar ornatý óńirde dostyq jáne tatý kórshilik qarym-qatynastardy jolǵa qoıýǵa yqpal etedi. Keıbir elderde ahýal turaqsyzdanyp, ınvestıtsııalyq klımat nasharlap otyrǵan kezde Qazaqstanda ekonomıkalyq odaqtyń arqasynda sheteldik ınvestorlar úshin jańa múmkindikter ashylýda, dedi Nursultan Nazarbaev.
"Elbasy Qazaqstan ekonomıkasyna ınvestıtsııa salý Eýrazııalyq ekonomıkalyq odaqtyń ortaq naryǵynda jumys isteý úshin ońtaıly alań bolatynyn atap ótti. Biregeı ınvestıtsııalyq sharttar, eń tómengi salyqtar jáne ınvestorlar men memlekettiń ózara qarym-qatynastarynyń turaqtylyǵy bizdiń eldi Eýrazııalyq ekonomıkalyq odaqtyń alyp naryǵyna kiretin «úzdik» qaqpa retinde kórsetedi, dedi Qazaqstan Prezıdenti", - delingen maqalada.
"Egemen Qazaqstan" gazetiniń búgingi sanynda fýtboldan Álem chempıonatynyń ashylý saltanaty jaıynda da úlken maqala jarııalanǵanyn aıta ketý kerek. Tórtjyldyqtyń basty oqıǵasy Astana ýaqytymen 12 maýsymnan 13-ne qaraǵan túni bastalǵan bolatyn.
"Keshe, maýsymnyń 12-nen 13-ne qaraǵan túni, Astana ýaqytymen 00 saǵat 15 mınýtta (biz tipti «búgin» dep sóılesek te bolady) Brazılııanyń San-Paýlý qalasyndaǵy «Korıntıans» stadıonynda álemniń XX chempıonatynyń saltanatty ashylý rásimi qanat jaıdy. Chempıonattyń ashylý rásimi aıaqtalǵan soń, stadıon oıynǵa daıyn etilgennen keıin alańǵa Brazılııa jáne Horvatııa quramalary shyǵyp, alamanǵa at qosylǵanyn aıǵaqty etti. Sonymen, kópten kútken fýtbol toıy da bastalyp ketti", - dep jazady "EQ".
***
"Kýrchatovta AES salynbaq...Stantsııa qurylysyna Reseı tarapy qatysady" dep habarlaıdy "Túrkistan" basylymy.
"Bolashaq AES-tyń reaktorlary reseılik úlgi boıynsha - sý negizinde jasalady. Indýstrııa jáne jańa tehnologııalar vıtse-mınıstri Baqytjan Jaqsalıevtiń málimdeýinshe, Kýrchatov - AES salynatyn jalǵyz qala emes, beıbit atom óndirý Balqash kóli mańaıynan da boı kótermekshi. «Ótken aptada Reseı tarapynyń qatysýymen salynatyn AES-tiń qurylysy týraly birinshi memorandýmǵa qol qoıyldy. Ázirge bul jobada jaı-japsary ǵana kórsetilgen. Budan keıin ótkiziletin sharalar naqtylanady... Jergilikti óńirdi zertteý jumystary 2-3 jylǵa sozylmaq. Jobany júzege asyrýdyń qarjylyq modelderi qarastyrylýda. Bizdiń paıymdaýymyzsha, 2018 jyly Qazaqstanda AES qurylysy bastalady. Elektr stantsııasynyń alǵashqy energııasyn 2023-2024 jyldary almaqpyz», - deıdi vıtse-mınıstr.
***
"Ekspress K" gazeti Qazaqstanda baqsy-balgerlerdi jaldaǵan býkmekerlik keńse jaıynda sóz etedi.
"Álem chempıonaty qarsańynda elordadaǵy býkmekerlik keńselerdiń biri óz kelýshilerine erekshe qyzmet kórsetpek. Mýndıaldiń ótetin barlyq kúnderinde utys tigetin kassalardyń janynda ekstrasenster, balgerler, tipti baqsylar óz qyzmetterin usynatyn bolady", - delingen maqalada.
Tolyǵyraq "Ýdar v býben" atty materıaldan oqı alasyzdar.
