EKSPO kórmesi kezinde Astanada 8 myńnan astam mádenı shara ótkizildi

ASTANA. QazAqparat -  «EKSPO -2017» halyqaralyq kórmesi aıasynda ótkizilgen mádenı sharalardyń qorytyndysy týraly búgin QR Úkimetiniń baspasóz ortalyǵyndaǵy baspasóz máslıhatynda Mádenıet jáne sport vıtse-mınıstri Aqtoty Raıymqulova men «Astana Opera» teatry dırektorynyń birinshi orynbasary Tóleýbek Álpıev aıtyp berdi, dep habarlaıdy RrimeMinister.kz .

A. Raıymqulovanyń aıtýynsha, Memleket basshysynyń tapsyrmasymen Mádenıet jáne sport mınıstrligi «EKSPO -2017» halyqaralyq mamandandyrylǵan kórmesiniń mádenı-oıyn-saýyq jáne sport sharalarynyń keshendi baǵdarlamasyn ázirledi ári ol sátti iske asyryldy deýge bolady.  

«Mádenıet jáne sport mınıstrligi «Astana EKSPO -2017»-men jáne elorda ákimdigimen birlesip, Astanada joǵary deńgeıde túrli janrdaǵy 8 myńnan astam (8 460) mádenı jáne sport sharalaryn uıymdastyryp, ótkizdi. Oǵan jetekshi qazaqstandyq jáne sheteldik shyǵarmashylyq uıymdary, mádenıet jáne sport sheberleri, sondaı-aq, Qazaqstannyń daryndy jastary qatysty», -dedi A. Raıymqulova.

Sonymen qatar kórme aıasynda elimizdiń aımaqtarynda da 31 myńnan astam shara ótkizildi, elordamyzda barlyq oblystardyń jáne Almaty men Astana qalalarynyń Mádenıet kúnderi uıymdastyryldy.

QR Ulttyq mýzeıi kólemdi ekspozıtsııalar men mazmuny jaǵynan biregeı kórmeler ótkizdi. Egıpet tarapy esebinen Ejelgi Egıpettiń arheologııalyq muralary qoıylǵan halyqaralyq kórme uıymdastyryldy. Islam óneri mýzeıiniń (Egıpet, Kaır q.) jınaqtarynan «Sultan Beıbarys jáne onyń dáýiri» halyqaralyq kórmesi ótkizildi. Alǵash ret elimizde «Imperator Tsın Shıhýandıdiń Terrakota áskeri» mýzeıiniń halyqaralyq kórmesi ótti. Sondaı-aq, Ulttyq mýzeıde Memlekettik Ermıtaj qorlarynan Qarý-jaraq óneriniń halyqaralyq kórmesi ashyldy. Barlyǵy EKSPO -2017 kezinde Ulttyq mýzeıdi 300 myńnan astam adam aralady.

Budan ózge, mańyzdy ımıdjdik joba retinde qazaqstandyq jáne gollıvýdtyq juldyzdar, «Oskar», «Altyn globýs», «Sezar» syılyqtarynyń laýreattary Nıkolas Keıdj, Edrıan Broýdı jáne Djon Malkovıchtiń qatysýymen ótken «Eýrazııa» HІІІ halyqaralyq kınofestıvalin atap ótýge bolady.

«Bir sózben aıtsaq, E. Broýdı, Dj. Malkovıch qazirgi tańnyń ózinde belsendi baılanys ornatyp, álemge Los-Andjelestegi kórmeniń prezentatsııalarynda, «Karnegı Holl» teatrynda jáne t. b. jerlerde Qazaqstannyń san qyrly mádenıetin tanystyryp júr», - dedi vıtse-mınıstr.   

«Astana Balet» teatrynyń, «Astana Opera» MOBT, «Qazaqstan» OKZ alańdarynda koreıalyq trýppa Universal Ballet, AQSh-tan kelgen Bad Boys of Dance, «Astana Balet» teatrynyń, «Astana Opera» MOBT balet trýppasynyń, sondaı-aq, álemdik balettiń tanymal solısteriniń qatysýymen Eurasian Dance Festival balet óneriniń halyqaralyq festıvali ótti.  

«EKSPO -2017» kórmesiniń mádenı baǵdarlamasy Qazaqstan halqynyń mádenıet jáne ónerdegi jetistikterin jan-jaqty ári tolyq kólemde kórsete bildi. Keshendi baǵdarlamada qazaq halqynyń tarıhyn, mádenıetin jáne salt-dástúrin ashyp kórsetetin sharalarǵa erekshe kóńil bólindi», - dep sózin túıindedi A. Raıymqulova.