EKSPO-dan keıin qaladaǵy 95 hosteldiń 33-i jabylyp qaldy
EKSPO kórmesine daıyndyq barysynda qalada 95 hostel jumys istegen bolatyn. Qazir onyń 62-si ǵana jumys istep tur.
«Búgingi kúni elordada 62 hostel bar. Onda turý aqysy orta eseppen 2500 teńgeni quraıdy. Maýsymǵa baılanysty baǵa ózgerip otyrady», - delingen «Astana konvenshn bıýro» usynǵan aqparatta.
Belgili bolǵandaı, hostelder iskerlik jáne jastarǵa arnalǵan bolyp bólinedi. Astanadaǵy kórme aıaqtalǵan soń qaladaǵy hostelder naryqta ornyn saqtap qalý úshin túrli qadamdarǵa bardy. Biri baǵasyn arzandatsa, endi biri stýdentterge uzaqmerzimdi jalǵa berý úshin arnaıy jeńildikter jasady.
«Búginde qaladaǵy hostelderdiń basym bóligi jatyn oryndy uzaqmerzimdi jalǵa berý esebinen kún kórip otyr. Hostel turǵyndarynyń negizgi bóligi jastar. Sonymen birge, sońǵy ýaqytta orta jastaǵy azamattardyń sany artyp kele jatqanyn kórip otyrmyz», - delingen aqparatta.
Al «Esil» hosteliniń basshysy Aınash Ahmetova bul salada paıda tabýǵa bolatynyn aıtady. Tek, ol úshin hostel ornalasatyn páter ózińdiki bolýy tıis. Ol óziniń tórt bólmeli páterin hostelge aınaldyrǵan.
«Men osy qysqa ýaqyt ishinde azdy-kópti paıda taptym. Sebebi, bul meniń ózimniń páterim. ıAǵnı páter jaldaýǵa aqsha shyǵyndamaımyn. Sonymen qatar tazalyq jumysymen, kir jýý sııaqty jumystardy ózim isteımin. Adam jaldap olarǵa jalaqy tóleýge aqsha shyǵyndamaımyn», - dedi Ahmetova.
Al «The rooms» hosteliniń jetekshisi Gúljan Kenjeǵalıevanyń aıtýynsha, hosteldiń tabysyna ornalasqan jeri áser etedi.
«Men EKSPO kórmesi qarsańynda tabys tabamyn degen maqsatpen hostel ashtym. Alaıda tapqanym shamaly. Tórt aı ishinde bizde bar-joǵy 200-ge jýyq adam boldy. Menińshe jumystyń júrýi hosteldiń ornalasqan jerine baılanysty. Sebebi, meniń hostelim qalanyń sol jaǵalaýynda bolǵanymen ortalyqtan jetý qıyn. Jumys júrmeı, paıda ákelmegen soń, ony jabýǵa týraly keldi. Eń bastysy - sony ashýǵa qaryzǵa alǵan aqshamdy áli kúnge deıin qaıtarmadym», - dedi Kenjeǵalıeva.
Foto: elorda.info
