«Eksımbank Qazaqstan» AQ-ny taratý týraly sot sheshimi zańdy kúshine endi
«16 qańtarda Almaty qalalyq soty Almaty qalasynyń Mamandandyrylǵan aýdanaralyq ekonomıkalyq sotynyń «Eksımbank Qazaqstan» AQ-ny májbúrlep taratý týraly 2018 jylǵy 28 qarashadaǵy sheshimine «Qazaqtelekom» AQ-nyń shaǵymyn qanaǵattandyrýsyz qaldyrdy. Osylaısha, MAES-tyń «Eksımbank Qazaqstan» AQ-ny májbúrlep taratý týraly 2018 jylǵy 28 qarashadaǵy sheshimi 2019 jylǵy 16 qańtarda zańdy kúshine endi», - delingen habarlamada.
Ulttyq banktiń málimetinshe, jeke tulǵalar men jeke kásipkerlerge «Eksımbank Qazaqstan» AQ-daǵy salymdarǵa, aǵymdaǵy shottarǵa jáne tólem kartalaryna ornalastyrylǵan aqsha óteledi. Ótemaqy «Qazaqstannyń depozıtterge kepildik berý qory» AQ-nyń (QDKQ) qarajatynan jınaqtalǵan syıaqyny eskere otyryp, biraq depozıtter boıynsha kepildiktiń eń kóp somasynan aspaıtyndaı salymnyń, bank shotyndaǵy nemese tólem kartasyndaǵy aqsha qaldyǵynyń somasy sheginde tólenetin bolady (teńge depozıtteri- 10 mln teńge, shetel valıýtasyndaǵy depozıtter - 5 mln teńge, bir salymshynyń bir ýaqytta teńge jáne shetel valıýtasyndaǵy depozıtteri boıynsha - 15 mln teńge).
Eske keter jaıt, shetel valıýtasyndaǵy depozıtter boıynsha ótemaqy teńgemen tólenedi. Ótemaqy somasyn esepteýde 2019 jylǵy 16 qańtardaǵy naryqtyq aıyrbastaý baǵamy qoldanylady. Zańǵa sáıkes kepildik qorynan depozıtter boıynsha kepildi ótemaqy «Qazposhta» arqyly tólenetin bolady.
«Eksımbank Qazaqstan» AQ-nyń salymshylarynan ótinish qabyldaý jáne ótemaqy tóleý alty aı ishinde - 2019 jylǵy 4 aqpannan bastap 4 tamyz aralyǵynda júrgiziledi.
Aıta keterligi, 2019 jylǵy 4 tamyzǵa deıin «Qazpochta» AQ-qa júginbegen salymshylar agenttik kelisimniń qoldanylýy aıaqtalǵannan keıin QDKQ-qa tikeleı tıisti ótinish bere otyryp, ótemaqy alýǵa quqyly.
Sondaı-aq, ótemaqy alý tártibi týraly, sondaı-aq ótinishter qabyldanatyn «Qazposhta» bólimsheleriniń mekenjaıy týraly aqparat qosymsha jarııalanatyn bolady.
